聖誕節同新年啱啱過去，農曆新年話咁快又嚟，最忙係商場大業主，因為又要為商場裝身，好似善於經營商場嘅太古地產，已經為鰂魚涌太古城中心商場做緊迎接農曆新年嘅布置，聽講今個禮拜五就會完全變身。
羊年將至，太古城中心商場布置自然唔少得同羊有關嘅裝飾，佢哋重以「如意吉羊」做主題，用花卉砌成五隻綿羊嘅「五羊城」，重會做一棵四十呎高嘅桃花，取名「桃花祈福樹」。聽講重有少數民族音樂滙演、皮影戲同木偶表演。
至於農曆年期間喺商場購物，就可以參加「幸運三重獎」，有機會抽到應節兼趣致嘅金草吉羊公仔。大獎有八萬八元嘅簽帳額、等離子電視同三両足金金羊等。
聽講其他商場都趕緊工拆除聖誕裝飾，換上農曆新年新裝。總之就係希望大家多啲幫襯啦！
與時並進係生存之道，發展商賣樓都一樣。恒基大角嘴港灣豪庭，由賣樓花到𠵱家一期住宅已經入伙，重有單位待沽，發展商除咗喺現樓搭建示範單位外，售樓書都有啲唔同，封面轉咗係一幅坐郵輪歎世界嘅相，同樓盤嘅海景，兼有郵輪概念商場互相呼應。
雖然只係改封面，但可以證明發展商知道市場轉變，作出回應。其他樓盤唔知會唔會仿效，以增加新鮮感。
美聯物業沙田大埔區分行大豐收，兩間分行高踞集團去年業績榜第2同3位，住宅最佳營業員又係出自呢區，攞到董事組季軍嘅沙田大埔區助理董事鄧天勇話，佢哋舊年總共做到1.2億元數，比01年多咗15%，原因係有幾個大盤開售，好似沙田皓朗山莊同伯爵堡、大埔滌濤山、馬鞍山嘅海典灣，同曉峰灣畔等。
佢轄下Top5分行係沙田豪宅、駿景園、大埔豪宅、沙田第一城同馬鞍山樓花組。至於Top5營業員係何能儉、劉映彤、吳美蓮、廖連貴同黎結貞。
土地註冊處啱啱公布舊年嘅樓宇買賣合約數字，登記宗數比前年少咗2.6%，總值就跌3.8%。蘭西留意到另一項數據，係市民查冊次數，原來舊年總共約有二百八十二萬次，比年前減少一成一，即少咗超過三十六萬次。
以每次查冊最低消費十五蚊計（只係查最新業主資料），涉及嘅銀碼就係五百四十八萬，對自負盈虧嘅土地註冊處嚟講，都咪話無影響。睇嚟土地註冊處都要諗計，點樣先可以平衡收支。
蘭西
電郵地址：
