響美國底特律舉行嘅北美國際車展（NorthAmericanInternationalAutoShow），已於剛過去嘅1月5日正式開幕，場內展出多款備受矚目嘅新車，以及一系列概念車，全都給予在場車迷有目不暇給之感；雖然未能親身前赴會場採訪，但我哋仍從互聯網上，取得部份廠方公布嘅資料，並即時為大家報道，好讓大家能一睹各款新車嘅風采嘛！
記者：鄭達基
早前我哋曾經報道過，不少關於新款豐田Harrier（即凌志RX300）嘅消息；但響今屆北美國際車展上，廠方就展出咗新一代RX330型號，並吸引到不少車迷注視。新車除擁有全新造型外，車廂豪華程度亦不遜於現有RX300型號；同時，新車更用上一台3.3公升V6引擎（馬力230ps/5600rpm；扭力33.5kgm/3600rpm），不但好力運轉寧靜之餘，加上VVT-i技術，更能令新車有低耗油量及低廢氣排放嘅特性。而新車更備有多套電子系統如VSC、ABS等等，從而可提高行車安全性呢！
另一部於日產展館展出嘅新車，就係呢部走MPV路線嘅Quest喇！Quest係由日產廠方於美國嘅設計部門負責設計，外形圓渾有致之餘，重好有美國車Feel㖭！車廂除與其他MPV一樣，以空間闊落、座椅靈活多變掛帥外，設備配搭亦見齊全，包括有高級音響組合、左右獨立恒溫冷氣、後排冷暖氣系統，以及多個雜物匣及杯座，以切合其MPV身份呢！動力配搭亦以一台3.5公升V6嘅VQ系列引擎作核心，並附有最新CVTCS技術，難怪馬力輸出可高達230匹以上，同埋重有慳油、運轉寧靜嘅特性啦！
福特427概念車，係糅合咗60年代福特汽車嘅外形，以及現代車廂配搭所設計而成；車身線條甚具美國車韻味，並與60年代嘅美國汽車相似，望落甚具ClassicFeel。而車廂配搭則好有現代感，除備有黑色真皮桶椅配搭外，另外重有酷似戰鬥機嘅表板配搭、設計獨特嘅波棍等等，當然唔少得重有電鍍裝飾啦！不過，相信最矚目會係一台7.0公升引擎，馬力輸出高達590匹，真係一啲都唔講得笑㗎！
相信福特Mustang呢個名字，大家都唔會感到陌生，皆因響呢39年內，已有不少車迷以此車為座駕，因而令其名字名噪一時；而廠方為延續此車嘅聲勢，故於會場內展出全新MustangGTCoupe及Convertible概念車，務求吸引車迷注意。新車造型仍帶有濃厚嘅美國色彩，同時重滲有強烈嘅跑車氣息，就連車廂配備亦好有CyberFeel，除有電鍍裝飾外，闊落乘坐空間及齊全車廂設備亦為重點之一。然而，廠方特意為MustangGTCoupe及Convertible概念車，配以一台4.6公升直4Superchrged引擎，馬力輸出約400匹，匹配6前速手波或5前速自動波，從而令新車有出色嘅性能表現，加上四輪Brembo透氣煞車碟，亦可予人收放自如嘅效果呢！
有望於2004年推出嘅FreestyleFX概念車，絕對稱得上係多用途車種嘅Crossover之作，佢不單止可以變做一部6座位Sportwagon，又可以變做4座位房車，重可以變身做4座位Pick-up㖭！而車內座椅亦見靈活多變，可按不同需要而作出變化；而車上更備有DVD影音系統，從而令沉悶嘅旅程變得富樂趣。同時，此車用上一台3.0公升DuratecV6偈作動力核心，並輔以CVT波箱，不但令行車表現更順滑之外，而且重可以有較傳統自動波箱低約10%耗油量嘅表現呢！
奧迪車廠響會場上，展出咗造型極富活力感嘅PikesPeakQuattro概念車，並惹來不少注視目光；新車以鮮豔嘅車身顏色示人，襯以極富年輕活力感嘅造型，從而令人對其留有深刻印象，而全新XenonPlus頭燈亦可有助增強照明度㗎！另外，車上一套Audi-MMI（MultiMediaInterface）系統，可接駁DVD、MD，甚至上網都得，就算遇到長途旅程都唔怕悶啦！此車更配用上一台V8Turbo引擎，馬力輸出高達500匹外，加上一套氣墊懸掛及Quattro四驅系統，故此無論On-road抑或係Off-road，都可有出色表現呢！
佳特力Sixteen概念車，除擁有長長嘅車體外，加埋24吋胎軨配搭，可令人對其有深刻印象，而車內重備有DVD影音系統、Bose揚聲器，以及其他先進配備呢！另外，一台容積高達13600cc嘅V16引擎，馬力輸出高達1,000匹，可想而知佢嘅性能表現係幾咁強勁呢！
同樣成為會場焦點之一嘅第6代日產Maxima，響外形設計上甚具跑車意識，當中極富肌肉感嘅車身線條，以及分別為17吋（3.5SL版本專用）及18吋（3.5SE版本專用）嘅跑車胎軨配搭，就最能夠將呢個特點顯現出來。車廂配搭方面，新一代Maxima備有Skyview玻璃頂配搭，除較傳統天窗來得吸引外，而且重可給予乘客有更多親近大自然嘅機會；加上軸距有所增長，故此亦能營造出更闊落嘅乘坐空間呢！然而，新車仍沿用一台得獎無數嘅VQ系列3.5公升V6引擎，不僅馬力輸出高達260匹以上，其中頂級3.5SE型號，更可選配一套6前速CloseRatio手動波箱，從而令性能表現更突出㗎！