烏克蘭前鋒列布夫認真運滯，呢幾年已經響熱刺雪到硬晒，最近重有兩個假「伯樂」玩佢，認真慘情！
富咸嘅前鋒般莫迪日前表示，希望領隊泰簡拿買埋列布夫番嚟，增強隊波攻力。但係富咸已經有馬列及沙華等射手，連因傷缺陣多時嘅沙夏，響前晚足總盃對伯明翰時復出亦有士哥。般莫迪響隊中已經難爭正選位啦，重叫球隊買埋列布夫番嚟？人哋都夠慘啦，講笑搵第樣好喎！
而之前話想借用列布夫嘅土耳其球會費倫巴治就重衰，睇嚟又唔想要列布夫嘅同時，竟然向莫斯科斯巴達嘅比斯查尼基埋手！身為烏克蘭人嘅列布夫最後都要輸畀個俄羅斯人，真係左一巴右一巴囉！
狼隊能夠響足總盃爆冷擊敗紐卡素，我求大俠認為幾個入球功臣功不可沒之外，唔可以唔提下佢哋嘅後防球員尼士葛！先有無端端拉跌比拿美輸咗個十二碼；然後就護空門連環擋出舒利亞及阿古拿嘅射門，跟住又有門前解圍撻Ｑ差啲又輸番粒嘅鏡頭出現，咁鬼戲劇性嘅演出，真係寫個服字畀你囉！
喺禮拜日有傳皇家馬德里想斟愛華頓嘅足球神童朗尼，搞到「拖肥糖」鬼死咁緊張，拿拿臨喺禮拜一出嚟澄清，話根本冇咁嘅一回事。講真呀，我求大俠覺得愛華頓實在毋須大驚小怪，事關皇馬個陣強到你唔信，而且一對箭頭魯爾同朗拿度都係得廿五同廿六歲，試問又點會對朗尼呢啲重未有成就嘅口靚仔有興趣呀！
啲人話英格蘭足總盃係爆冷溫床，原來法國盃爆得重勁。連同周日斯特拉斯堡、特魯瓦同色當，首圈就有九支法甲球隊出局。點解法國盃會爆到七彩？啲法甲球隊啱啱歇完冬，球員狀態未操起，對住啲戰意十足嘅低組別球隊唔輸就假。好彩梳打埠唔開法國盃，唔係真係輸到啲波友甩褲！
噚日拓荒者繼續強勢，作客「搞掂」紐約人，不過隊中嘅丹尼奧斯就打到發緊夢咁；難得史杜達米亞同戴歷安達臣唔出得，破例有正選打，但佢打足三十四分鐘連一個助攻都冇，重話因為無諗過自己有得打正選控球後衞。計我求大俠話，家陣經濟唔好，打工仔最緊要識表現自己，如果唔係，分分鐘隨時執包袱走人！