大市連升4日，又有82點進帳。是日升市功臣係中移動（941）同滙豐（005），前者收19.80元，升50仙，後者升75仙，收88.50元。
中移動郁，相關Call輪自然生性。最活躍嘅9526彈跳22%，9532亦升21%。兩隻Call輪槓桿率20倍過外，正股郁2.6%，佢哋發揮8倍嘅槓桿效應，輪價變動2成亦順理成章。正股升到𠵱家個位，距離2字齊頭好少，除非有利好消息，否則暫時上升空間可能有限，高追Call輪最好先考慮一吓。假如正股唔肯回頭，直上20.50元，則不妨細注睇跌嗰便，買少少Put輪，對象係9440同9543。9440昨收22.5仙，散17%，重有唔夠3個星期夠鐘，隻輪又屆末日，對正股反應好敏感。9543昨收14.7仙，散15%，3月中到期，溢價6.4%，槓桿率13.5倍。尚餘壽命唔算長，坐盤咪太耐，限12.5仙上車，反彈賺錢即離場。
滙豐升，留意中銀（2388）或會受到帶動。中銀就算唔升，都唔怕大跌，收集定啲中銀Call輪，對象係9462，呢件勝在溢價低，就算坐盤坐得耐啲，都唔驚蝕水。
當然，由於中銀動作通常唔大，9462一方面冇乜大嘅殺傷力，一方面爆炸力亦有限。
章盛