阿董明日宣讀連任後首份施政報告，近日本港天氣則急速轉凍，豬朋狗友以講笑口脗問阿虎，明日會否落雪？阿虎唔係天文台台長，當然唔知道，但以上問題就反映唔少人對阿董呢份報告嘅感覺──就係香港已進入寒冬。
施政報告必然涉及削減開支及加稅呢類令好多人唔開心嘅內容，財困令港府縮減財政開支及加稅，大家不求有驚喜但求無驚嚇。阿虎唔驚政策令港人（包括公務員）唔開心，最驚就係政策唔公平，及不能令外資相信港府最終能實現收支平衡。大家都知，阿董最鍾意做好人，政策經常左搖右擺，搞到唔湯唔水。恒指噚日升82點，收報9665，但成交只有45.37億元。
早前被證監會勒令停牌嘅大凌（211），傳聞就快復牌，因為公司決定向聯交所交代多年集資用途。不過ｉ師傅話，據聞今次證監乃有備而來，加上聯交所上市科對問題公司審查得好嚴，係咪咁容易畀大凌復牌，實在好難講。大凌供股計劃拉倒後，據聞有人想故技重施，藉供股告吹而將股價大幅推高散貨。大凌在此之前亦曾經公布供股，股價跟住大跌，有人趁機收集，當公司取消供股計劃，股價大幅反彈時，有人隨即在高位散貨。市場傳出，今次大凌供股失敗，因為枱底持有近30%股權嘅股東投反對票。
恒發（097）復牌第二日在6.20元覓得支持，據聞買盤主要來自基金補倉盤。早前恒基地產（012）提出私有恒發時，部份指數基金偷步沽出恒發，如今恒發私有化失敗，恒指服務公司又未公布恒指更替，所以要快快手買番，成為恒發近日主要支持，但據聞有關基金已經補到七七八八。
阿虎