羅家英雖然一把年紀，但同啲十幾歲嘅年輕人一齊玩都完全冇隔膜，就好似大前晚九點幾，馮仁昭喺九龍塘牛津道球場，見到家英哥同班十幾歲嘅年輕人一齊踢波，家英重好威風咁做前鋒。開波之前，家英哥猛同啲後生仔喺度吹水，傾到不知幾咁開心。不過，到佢落場踢波嗰陣，先至知家英哥原來有姿勢冇實際。
事關家英哥雖然做前鋒，但個波喺正佢面前，佢都竟然唔多願意走動，結果成晚家英哥一球都入唔到，你都咪話唔失威。
馮仁昭以為家英哥踢完波之後，會走去沖涼揼骨，但結果佢同啲波友，走咗落去九龍城福佬村道一間叫做蛇王東嘅食肆食蛇羹，一大碗都只不過係二十八蚊，家英哥真係識得補身。而喺家英哥食蛇羹期間，重巧遇老友尹志強，唔使馮仁昭多講，家英哥梗係又再發揮佢嘅吹水神功，同尹佬雞啄唔斷啦！
李玟喺上星期五以代言人身份去咗北京出席喺華彬酒店舉行嘅蘭詩頓服裝記者會，早排佢去過NBA，不過唔係打波，而係以佢嘅專長獻唱助興。李玟話身為華人，可以為中國籍球員姚明打氣好開心，但李玟最開心嘅係姚明都話鍾意佢，李玟重話睇住姚明面紅紅、怕怕醜醜個樣，佢都好喜歡對方喎！
前晚《麗花皇宮2003》吸引陳寶珠同梁思浩等捧場，肥姐接受訪問時提到欣宜話想入娛樂圈，佢話：「希望佢興趣會轉彎，呢行好辛苦，壓力又大，希望佢諗清楚啦！」睇嚟肥姐唔係好想個女入娛圈，而欣宜都好乖，佢話𠵱家讀書為重，讀完書先再諗喎。高志森亦提到同焦媛嘅感情，佢話大家重係男女朋友，不過感情已轉淡。
陳文媛（BoBo）同何韻詩噚日去咗港台做一個宣傳禁毒既活動，阿詩同BoBo合照嘅時候不停扮陳冠希（Edison），學Edison影相嘅甫士同埋歪嘴。問到阿詩係咪知道BoBo同Edison復合，所以先扮佢，阿詩即刻詐儍扮懵話：「吓？我唔知㗎，我都係睇報紙。」而BoBo就係咁話要打阿詩。
余文樂噚日去天水圍出席商場活動，佢講起呢排有啲歌迷過份熱情，經常半夜三更打電話畀佢，所以考慮改電話號碼，樂仔話：「佢哋通常都喺三更半夜，我瞓緊嘅時候打嚟，有啲就話想同我傾偈，有啲就唔出聲，搞到我平時忙完一日都冇時間休息，真係覺得好大壓力㗎！我估佢哋覺得我冇照顧晒佢哋咁多個，但我想話我對佢哋係一視同仁。」
噚日曾志偉去啟德舊機場義賣慈善福袋，早排志偉個仔曾國祥俾人打到入院，志偉話原來佢個仔係見到朋友俾人打，所以幫手，至俾人打。不過曾國祥重傷過個friend，志偉就覺得細路係要有經歷，打交都無可厚非，要出街就小心啲，如果唔係就唔好出！
