文化中心外，董太繃緊嘴臉說「香港唔衰得」，落手落腳執垃圾說「早知帶柄掃把來」，是2003年第一樁惹笑的頭條新聞。「特首垃圾婆」身旁貼身站着一個女助理，挽住一件毛領大衣。特首夫人蹲在花槽示範香港唔衰得，身段不算優雅，好彩助手代挽大衣，構成的畫面，跟除夕晚對清場警員彈起中指抗議的印巴青年來個尖銳比拼，實在發人深省。
香港唔衰得，比香港一定得有說服力。一定得？大佬，除非集體啪偉哥，否則，你話得就得咩。唔衰得，相對留有餘地，擺明有彎轉。只要不是衰到貼地，衰到街知巷聞，鬧國際笑話，衰得來還有個譜，尚可七五折收貨。
香港唔衰得，出自董太臨場爆肚語錄，董太急智，無疑比7-11的董先生強得多。唔衰得，是全城市民的共識。是以不能不懷疑，政府唔衰攞來衰，夾硬倉卒今年七月通過23條的居心。文化中心有愛心大使清理，迅速回復公廁原貌。通過23條，則香港淪陷成警察之都和鎮壓異見之城。往日的自由多元生猛喧鬧特色，掃走不留。香港唔衰得，用膠紙打包樹幹是第一步，接着會打包傳媒、教會、文化工作者、學者、法律界的鼻孔嘴巴，封堵不讓發聲呼吸。香港唔衰得，但死得！