趙飛雲上周四股市逃過一劫，諗住大難不死有後福，上周六又入馬場搏殺，點知買Win跑第二，買Place跑第四，結果都係要破財擋災。今個禮拜要發憤圖強，希望喺股市搵番啲幫補。
上周四美股發威，杜指大升256點，而且上周五未見大幅回吐，杜指跌近50日線（現處8552）就反彈，最後僅跌5點，收8601。杜指上周大升後，技術有明顯改善，MACD線重新升越訊號線，10日線亦轉跌為升，形勢由好淡三七波變五五波，甚至好友可以秤先啲。杜指短期如守穩8500水平，唔排除好友先有一次大反攻。
港股近期走勢落後美股，杜指破阻力而上恒指冇跟，杜指未散則恒指先變蟲。上周五恒指跟隨美股反彈，大升218點，但技術走勢未出現大突破，上周五杜指回吐壓力唔大，大戶如果有心再挾淡，今日可以再抽高啲，但在未升破20日線9663及50日線9765之前，技術重未可以話有轉勢迹象。
睇番上周五大藍籌表現，李嘉誠近排不斷增持嘅長實（001）一系，升幅較大。和黃（013）升上50日線51元收市，9RSI亦升破50中軸，技術走勢有轉機，短期守住50元，須重新估計。長實上周五升至20日線水平，破位可見54元。滙豐（005）走勢和長實近似，上周五升至20日線止步，50日線在88.20元，升多2個價便可重返其上。3隻主力藍籌今日能否向上突破，對後市有重大影響。
趙飛雲