港區人大代表黃宜弘平日喺立法會好少發言，好多人以為佢不苟言笑，其實佢不知幾玩得。好似啱啱過咗嘅星期六、日，佢喺東莞間紙品廠兼超豪大宅招呼香港傳媒，劈酒、唱歌、跳舞瓣瓣掂，六十四歲嘅黃宜弘跑贏後生過佢嘅立法會議員葉國謙同單仲偕幾條街。
唔講唔知，呢位酒霸三十一歲之前，原來滴酒不沾，甚至連咖啡都唔飲，但係三十一歲嗰年，佢由美國返港之後，因為從商應酬多，開始學人飲酒，當時有叔父輩已經讚佢喺飲酒方面有天份，久而久之就愈飲愈豪。
佢太座梁鳳儀就話，黃宜弘以前應承過話平日唔飲酒，只係有應酬先飲，不過後來先發覺，原來佢晚晚都有大大小小嘅應酬！
黃宜弘娶梁鳳儀嘅時候，唔單止有個「不飲酒」承諾，重不知幾咁浪漫，刨晒梁鳳儀寫嘅小說。婚後呢？佢話得閒搭飛機咪睇吓囉！不過佢讚太座好記性，好記得佢平日講過嘅精句，重不時寫落小說度，唔知梁鳳儀嘅書迷有冇發覺呢？
傳真︰2623-9278
電郵︰