噚日朝早香港氣溫只有十四度,對長跑運動其實幾適合。不過,由於今屆香港十公里挑戰賽太多人參加,三千幾名運動員完成比賽後,要排隊二十幾分鐘先可以攞番自己嘅衣物,個個着住背心短褲兼出完一身汗,喺呢段時間排隊真係凍到入心入肺。
今屆賽事大會得到一間雪糕公司贊助,特別運來幾千支「怪獸公司」雪糕免費派發。每名跑手比賽完後,已經急不及待排隊攞雪糕食。都啱嘅,既然跑步消耗咗咁多卡路里,食番支雪糕補數都唔算過份。
今年比賽場地同上年一樣喺將軍澳工業邨內舉行,即前幾日發現人體死屍標本嘅堆填區附近,雖然比賽路段間中都會聞到陣陣怪味(唔知係垃圾味定係屍臭味),但一班參賽者依然專業精神可嘉,競賽時一啲投訴都冇。