長輩教落，食飯時唔可以食出聲，否則就冇禮貌、冇家教，不過若果嚟到沙田麗豪酒店嘅麗寶餐廳食自助餐就唔同喇，皆因餐廳最近搞咗個啜麵鬥大聲比賽，邊個最大聲就可以免費食價值$198嘅自助晚餐。搞到在場唔少靚仔靚女都不顧儀態咁啜到「雪」「雪」聲，同場重有鬥快食泡菜，贏埋嘅話分分鐘可以免費拍拖撐枱腳㖭！
記者：劉耀祥
攝影：陳陶鈞、伍慶泉
Model：Polly
大家都知道，日本人同我哋啱啱相反，認為食麵食得愈大聲代表愈好味，愈有禮貌咁話。所以麗寶餐廳就趁住日韓食品節搞咗個「食麵『咮』榮鬥一番」嘅食麵鬥大聲比賽，而選用麵類就當然係日本麵啦，為咗力求公平公正，重特別買咗個分貝測量機量度各位參賽者嘅「雪」「雪」聲有幾勁。
參賽辦法相當簡單，只要喺現場食緊自助餐嘅顧客就可以即時報名參加，名額不限，但每人每晚只可玩一次，而採訪當晚就有10名參賽者，以全場約有50名顧客嚟講，反應都算幾踴躍。而10位參賽者中，其中3位更來自「管」家，可惜三位管家成員最後都落敗，但就覺得非常過癮，重話會下次再嚟玩過。「我哋衰在唔夠經驗，如果啜嘅時候加埋啲湯，咁就會大聲好多。」其實管先生成績都唔差，有89分貝。
雖知89分貝已達嘈音標準，咁冠軍咪分分鐘震耳欲聾？其實冠軍陳先生只以些微之差，以90.5分貝險勝，一條人多車多嘅彌敦道都只不過係85分貝，可想而知有幾嘈。而當初只係抱住大家高興先參加嘅陳先生，原來對啜麵都有一番心得。「平時自己都已經好鍾意食麵，食嘅時候亦鍾意啜到大大聲，覺得好有快感㗎，可能訓練有素，先至可以食到咁大聲，其實心得就只係連湯帶麵一齊啜，會大聲好多㗎。不過都係第一次參加呢類遊戲，嚟到先知有啲咁嘅嘢玩，都幾得意，又有得玩又有得食。」
但第二日嘅戰況重激烈，個個參賽者平均都有90幾分貝，冠軍嘅張先生有成94.5分貝，連小朋友都有89分貝呢！
分貝參考表：
耳語 約20分貝
超靜冷氣機 約33分貝
一般談話 約60分貝
繁忙道路 約85分貝
機場跑道 約120分貝
話明係日韓食品大比拼，除了食日本拉麵之外，同場更加映「辣辣泡菜鬥快食」比賽，要喺一分鐘之內鬥快將整碟泡菜吞晒落肚謂之贏，起初小記同攝影師見到細細碟都以為好易食，點知睇見參賽者吞到面都紅埋先知道唔係咁簡單，要喺一分鐘之內吞晒佢都唔係易事。
唔知係咪辣嘅關係，第一輪參賽者全部清一色男性，而管先生亦繼續再接再厲落場鬥過，而且更以57秒成為最快嘅一個㖭。「都唔係好辣啫，我自己都好鍾意食辣㗎，就咁炒指天椒我都覺得好好食；不過除咗要食得辣之外，最緊要係吞得夠快。」管先生比賽完之後重問公關小姐點解自助餐冇泡菜供應，睇嚟佢真係好鍾意食辣噃。
採訪當晚，大會特登為我哋舉行第二場泡菜比賽（平時只係鬥一場），而今次終於有女將參賽喇！不過相信最唔開心就係管先生，因為「特別加場」關係，就俾蕭先生以54.9秒擊敗。「麻麻哋辣啦，大約兩個辣左右（十個辣為滿），但吞到最尾嗰兩啖就好辛苦，要分三次先吞得晒。」
雖然蕭先生口中話唔係好辣，但睇見佢吞到面紅耳熱，比賽完都要坐低飲杯水唞一輪至可以同我哋傾偈，就知唔簡單啦！我都試過啲泡菜，一碟都食唔晒，其實都幾難「啃」㗎！
地點：沙田麗豪酒店3樓麗寶餐廳
比賽日期：即日至2月28日
比賽時間：7:30pm-8:30pm
價錢：成人$178/小童$128（一至五）
成人$198/小童$148（六、日及公眾假期前夕）
自助餐供應時間：6:30pm-10:00pm
查詢：21321040