Nokia另一部內置鏡頭手機3650上市都有成個禮拜，八卦問吓啲Sales部機多唔多人買，問咗三間鋪都話每日大約賣到兩、三部，喺呢個咁嘅經濟環境下，三千幾蚊一部機嚟講都算唔錯。不過，其中一個Sales哥哥就話新機唔及7650，當時呢部機一出，最高峯嘅時候每日可以賣到四、五部。咁又係，話晒都係當時第一部內置鏡頭手機，當然吃香啲，唔似得家陣有咁多選擇，始終都分薄咗。
講開Nokia機，網上近日就流傳咗一單關於諾記新機嘅消息，話會有部細到好似女士們用嘅鏡盒咁細嘅手機，而且重有埋型號，叫做8580喎！不過睇過張相之後，好難令人相信佢係一部手機，唔見有鍵盤，亦都唔覺有麥克風同聽筒，究竟點傾電話都係一個謎！雖然個盒面有大大個Logo喺度，但就覺得似係紀念品或贈品多過似部手機喇！
上個星期五喺食飯時間行經中環最多人過斑馬線嗰個路口，聽到有人話：「可以影相㗎！」原來係數碼通嘅人喺度宣傳部內置鏡頭嘅SharpGX12。今次佢哋為咗呢部機又的確好落本，唔單止喺各大媒體勁谷廣告，而且用嚟介紹部機同新服務嘅小冊子重係全彩色印刷，非常精美。不過，部機又的確好吸引，尤其係啲Game，身邊已經有3個朋友買咗呢部機，你話吸引力有幾大！
Tinme唔係來自國內或台灣，而係百分百本地品牌，呢部型號為T918C、售價約$1,500嘅GPRS機，備有4,096色彩芒及和弦鈴聲，喺呢個彩芒輩出嘅時勢，唔算突出。可能你會覺得話晒都係港產彩芒機，有賣點喎！Sorry，部機只不過係用台灣機肉掛上自己品牌嘅OEM機，唔算百分百港產。