大編輯遊吉隆坡，搭的士搞到頭暈眼花。佢與家人到香格里拉酒店食新年自助餐，每位收八十元（馬幣），貴過文華東方，但自然比香港香格里拉平好多，而食物品種就不遑多讓，只可惜吉隆坡香格里拉咖啡室嘅自助餐之中嘅凍蝦、生蠔、魚生，一望就知係雪藏貨，毫不新鮮，香港人唔會吼。
但最大問題仍然係的士。吉隆坡香格里拉位於小山峯之上，環境清靜，以前係一流名店，但現在吉隆坡雙子塔鄰近嘅文華東方，夠晒方便，搶走唔少人客，香格里拉大堂loungebar，新年夜竟然冷清到極，兩位歌手對住空櫈唱歌，十分落力，但亦十分冇癮。點解會咁呢？大編輯話：「根本冇的士。我企喺門口等的士，十五分鐘之內都冇一架，如果行落斜路截，亦難保唔係得個等字。遊客出入要靠的士，冇理由個個都揸車嚟啫。」呢啲事好令人迷惑，亞洲大城市之中，香港、曼谷、台北、東京、大阪、上海、北京，叫的士都非常容易，大酒店門口更係的士排長龍，只有喺吉隆坡先至咁辛苦去搵的士，唔通因為的士咪錶收費太便宜，所以的士司機玩嘢？
大編輯親戚去KLCC（雙子塔商場）買嘢，亦有奇遇。親戚與印度裔女店員講價，店員話打九折，再講價店員畀張form佢填話：「你寫低係我sister個friend，我可以再減十巴仙。」印度人做生意真有創意，唔知香港店員可唔可以抄呢！