由SMAP孭飛嘅電視節目《SMAP×SMAP》去年嘅收視雖然麻麻，但節目仍然搞笑，SMAP五子集集都扮鬼扮馬，笑到我大口羅拉個口又大咗。
日本雜誌《TVGuide》最近做咗個調查，由讀者投票揀出去年喺《SMAP×SMAP》度最鍾意嘅人物，結果係由中居正廣反串扮松浦亞彌嘅人物Mayaya成為冠軍。無他嘅，中居着啲花碌碌嘅衫加埋含情脈脈嘅眼神，再嘟起個嘴，又幾有松浦亞彌神韻！
而木村拓哉同稻垣吾郎都唔輸蝕，佢哋扮演嘅鴨店二人組「光&優雅」就排第二位。第三位就係SMAP五位壯男一齊扮嘅留班十年「SMA小6年2組學生哥」，五個人嘅髮型同着住嘅校服真係好抵死！
至於木村同香取慎吾扮嘅「幪面戀愛超人戀騎&愛斗」，就排第四。其他唔少玩寸電影人物嘅角色都有上榜（詳見附表），當中包括有稻垣扮嘅哈利波特同三位成員扮嘅「SMASMA三劍俠」。