正當人人話飲食市道差之際，卻有人大唱反調，大灑金錢於豪華裝修之餘，再不惜工本用創業震撼價$30畀人試菜，目的只為一嘗開食店心願。憑住個人膽識及自信，一樣可以成為淡市中的奇葩。以主打京、川、滬新派外省菜的金滿庭在短短兩個星期內已做到幾乎晚晚爆場，奉勸大家一句，要試新菜最好訂位！
記者：陳冰麗 攝影：楊錦文
樓市股市齊不振，人人都負資產之餘，亦有人扒逆水，認為時機已至，金先生偏偏唔熟要做，向自己挑戰，無懼市道不佳，揀呢個時勢開食肆，認真夠膽識！
這裏的擔擔麵是以雞蛋混和麵粉搓成，再由師傅用人手拉成一條條的幼麵條，即做即煮，入口彈牙而帶有濃郁蛋香味，如此高質素，一碗也只是十零蚊大牌檔價錢。
餡料是用較瘦的上肩肉，肥瘦比例為2:8，這樣的肉餡既有質感，肉汁又豐腴香甜，加上只有肉而沒有豬皮粒在內，汁清而少一點肥膩感。
湯底充滿雞的鮮甜味，雞肉滑而香，雲吞亦因此吸收了雞的精華，變得更為入味。
分別是三種不同的食物再淋上不同的醬汁。較大的一球是紅燒獅子頭，有咬口，味濃帶甜；中間的一球則是桂魚肉所打成的魚球，淋上玻璃芡，味較清；最下的則是蝦膠肉，配以酸辣的宮保汁，惹味而又醒胃。
做法極講究，蛋白、蝦粒、帶子、海參等一同拂至起泡後，再以拖水至軟身的紹菜包入以上適量餡肉，然後蒸之，小巧精緻，剛好一啖一口，清爽而又不肥膩。
電話：29101000
地址：大角嘴奧海城二期UG06B
營業時間：12:00pm-3:00pm、6:00pm-11:00pm
座位：180個
付款方法：現金或信用卡
金先生最初對開舖一事充滿信心，但偏偏家人卻反對他開食肆，金先生稱：
「最初老婆仔女都唔贊成，重好大反應話『唔熟唔做，做嘅話實執！』」
真係一盆冷水照頭淋！不過，雄心壯志並沒有因此而變得消沉，相反更積極到處搵舖位、搵好廚師。透過朋友的介紹下，招攬了四位具經驗大廚，分掌京、川、滬菜。
為了吸引食客，一般的做法多是登報紙雜誌的廣告，又或者送十多二十元的優惠券等等，但金先生覺得效果會不及免費或平價試食做招徠好，所以開業最初實行不惜工本：
「最初有諗過畀人嚟免費試食，但諗清楚又怕招惹啲無謂人，場面必定難以控制，最終就決定以$30優惠價錢畀大家去試八道菜嘅策略，以做三日為限，原本名額只限60位，但無諗到反應居然咁好，最終有雙倍人數，每晚做足150位。」
一試得手，金生即時再賣大包，推出買一送一策略，同樣連做三日，以食幾多錢即送同等價值現金劵，兩個月內可以分開或一次過用現金劵。旁人睇必定會覺得金先生這樣做法必定蝕本，然而他卻有另一見解：
「送現金券雖然有啲蝕底，但只要啲客攞住啲現金券，我哋就有機會等佢哋再返轉頭幫襯。加上新舖最初實無人識，以平價試菜同買一送一策略，我認為效果比賣廣告重好，而且成本比喺電視賣廣告更抵，事實的確如此。」
據金先生統計所得，試菜的三日中最受歡迎的是蘭州手拉擔擔麵、小籠包和砂鍋雲吞雞。採訪當日，小記亦即場訪問十位食客，其中有七位亦一致對以上三款菜式讚不絕口，而我就最為欣賞大廚手拉的擔擔麵，入口相當彈牙，勝在夠抵食。
本身是上海人的金生至愛亦是上海菜，他大贊市面的上海菜館菜式水準不錯，唯一缺點是做得稍為油膩一點，令人誤解以為所有上海菜都好油膩（我亦贊同），其實正宗上海菜多以半煮半炒或燜的方式做法，所以應該不會大肥膩，而且味道會帶甜。