聖誕檔期的電影鬥得好不燦爛，妙就妙在每齣的戲軌都不大同，各自性格強烈，觀眾因應口味對號入座，因此票房總和相當和味，相信齋賣爆穀都搵到啖食。
港產代表一剛一柔，《無間道》剛到無倫，《金雞》則走陰柔一路，《英雄》全片有如富士菲林廣告，色彩豐富。最老幼咸宜的應又是《哈利波特》吧，觀看此片後有兩大類反應：1.由於已看過第一集，所以覺得第二集缺乏新鮮感；2.由於毋須要再從頭講遊戲規則，故此劇情早啲入肉，睇得較上集過癮。
主角四眼仔越大越似古巨基，唔拍《哈利波特》的話，可以考慮拍瓊瑤的劇集。紅頭髮的死黨同學今集搶盡鏡頭，其介乎陳奕迅及許冠英之間的演繹方法深得觀眾喜愛，幾個大笑位都是由他引發。新加插的角色是那位擁有魅力男士笑容的萬人迷巫師，造型像極了何守信先生，幸好有他的存在，大大提高了整齣電影的娛樂性。
故事簡單得不能再簡單，就是困在學校找密室，最後找到。方程式是見嘢就搞，車會飛、碗碟識自己洗自己、貓頭鷹識驚、書信識開口鬧人。特技是要用錢及時間堆砌的，荷李活老早就看準了這個遊戲規則，要同荷李活鬥錢多，三五七年內都應該冇乜可能。