繼日本三菱車廠於平安夜當日，公布咗去年11月製造及出口汽車數字有所上升後，日產亦於最近公布咗11月份嘅製造、銷售及出口數據，而成績亦令人鼓舞。
響11月，日產於日本本土生產嘅汽車數目為125,787部，比去年同期上升10.2%，能有此成績係因為新款March及Cube車系極受用家歡迎，而新款FairladyZ同樣備受追捧，因而令需求量大增而導致總產量有所增加；但海外生產線總產量卻微跌0.7%，只有108,135部新車出廠。
而本土銷售數字亦較去年同期上升14.6%（達65,012部），若以車型計算，其中新款March銷量勁升121.5%（達10,300部），而Cube亦大幅上升112.4%（達11,523部）；而響日本本土以外地區嘅市場亦有所上升，唯獨加拿大及墨西哥等地有下跌情況出現。同時，出口汽車數量亦上升高達20.4%（達69,908部），其中私家車佔59,519部，商用車則佔10,389部。照呢個結果睇嚟，日產汽車今年嘅業績定會更勝去年呢！