雖然話新年新希望，當然希望一年好過一年，不過，地產代理呢行嘅經營環境，就相信難有太大曙光。中原老闆施永青上個禮拜五就親筆撰寫新年訓示，一開首就警剔員工，整體經營環境未許樂觀，為顧全大局，集團確實需要量入為出，以較少資源做出高效益，收縮開支同減員工待遇都係迫不得已。新年流流講啲咁嘢，認真唔老利。
之不過，老施不忘勉勵員工，話集團嘅競爭力仍處於絕對優勢，喺幾個一手盤嘅推銷量都贏同行，叫大家唔使灰心。如面對唔到咁嚴峻環境嘅員工，大可蟬過別枝。選擇繼續作戰嘅，懇請佢哋上一堂調節心態課程。
值得恭喜嘅，係利嘉閣加入中原大家庭後，舊年嘅成績都算唔錯。上月分行收入龍虎榜，中原九龍舖位部攞到冠軍，但淨計住宅生意就係利記天下，太子道同跑馬地成和道分行，包辦頭兩名，分別有117.5萬同109萬元數。
呢幾年每年最少都有五六千個單位賣嘅新地，最新一期季刊披露，以集團攤佔權益計（即係全部屬於新地嘅），原來舊年下半年總共賣咗三千六百個，套現超過八十億。賣嘅大盤係馬灣珀麗灣、將軍澳中心（圖二）同屯門愛琴海岸。
季刊重爆咗個秘密，就係公司一直透過唔同途徑了解買家需要，然後將意見結合物業規劃，切合買家真正需要。喺珀麗灣同將軍澳中心開放現樓示範單位時，新地都有做意見調查，睇吓買家最關心係乜嘢。
薄扶林數碼港住宅貝沙灣，重等緊售樓紙，但係發展商電盈已經展開一浪接一浪嘅宣傳攻勢。上個月搞完池畔燒烤，今日有傳媒午餐會，重請意大利名廚，以頂級廚藝炮製佳餚畀記者歎，主題係介紹貝沙灣住客會所嘅尊貴生活新概念喎！
講飲講食講享受正係電訊盈科基建主席李智康嘅強項，睇嚟日後重會陸續有來，畀大家大開眼界。但幾時至到戲肉，開售日期同定價呢？睇嚟要耐心等候嘞！
02年剛完結，亦係發展商「算帳」嘅時間。永泰亞洲為表揚代理行舊年推銷旗下「三寶盤」佳績，包括九龍塘陶源、尖沙嘴漾日居同小欖漣山，搞咗個銷售比賽，由利嘉閣勝出，今日傍晚重喺深灣遊艇會頒獎，費用自然係由永泰亞洲包晒啦。比賽由利嘉閣勝出，聽講配合大會要求，赴會嘅員工，男嘅要穿着占士邦Look裝束。女嘅就要盛裝赴會。
美聯物業率先公布去年營業額排名榜，有五間分行做到過千萬數，比01年嘅兩間多，香港舖位部就榮登榜首，營業額約千二萬，沙田瑞峰分行同火炭駿景園分行就同係約一千一百萬攞到亞及季軍，將軍澳南豐廣場同淺水灣分行都有過千萬數。
工商舖助理董事黃子華就攞咗董事組嘅冠軍，而盧展豪同陳偉志就係區域經理組第一同三位，工商部營業員梁國文（圖三）舊年就促成三十三宗成交，做到五百萬數，躍升為最佳營業員首位。工商舖組真係威盡全場。
住宅方面，舊年齊齊升職嘅將軍澳及西貢助理董事李志成，同旗下區域經理郭玉滿，就喺自已嘅組別同奪得亞冠。至於住宅部最佳營業員就係瑞峰分行嘅何能儉，營業額超過三百萬，重係全公司最佳營業員第二位。
蘭西
電郵地址：
