位於中環心臟地帶嘅上海總會以美食出名，八方雖然唔係會員，但久不久都跟班老友去食一餐，蜜餞火腿、圓蹄、海哲頭等都非常正。
大吃之間，抬頭見到牆上貼有一張粉紅色善長名單，原來係該會嘅傳統，每年本港有頭有面嘅人物都會捐錢畀長者當利是，好似六叔邵逸夫捐三萬、陳鏵廷基金捐三萬、李福善捐兩萬、外交部駐港特派員吉佩定捐三千。女士都不甘後人，葉劉淑儀同汪明荃各捐一千。
八方聽講，葉劉以前未紮職上局長位，係上海總會嘅常客，𠵱家就去少咗，至於六叔亦冇乜出現。不過，既然呢個係上海總會嘅傳統，亦每年捐錢一次。
有位老夥計話，每年歲晚收齊啲錢就會轉交社會福利署代為分派。善有善報，呢啲傳統，值得表揚。
傳真︰2623-9278
電郵︰