美股杜指上周四勁升265點，周五只係回吐5點，收8601。港股今日有條件繼續挾淡，可以伺機買啲恒指Call輪短炒。
恒指Call輪現時最多人玩嘅係9552，隻輪3月28日到期，行使價9800，上周五收0.154元，溢價5.5%，槓桿率31.1倍。性格進取可以揀呢隻，博今明兩日恒指繼續升，快手快腳炒一轉。另一隻同類輪9553亦係3月28日到，行使價9000，屬價內輪，上周五收0.24元，溢價1.42%，槓桿率13.3倍，防守力較佳，波幅亦冇咁大，睇錯市冇輸得咁甘。
如果想揸長些少，可以揀9636，隻輪6月3日到期，行使價10300，上周五收0.123元，溢價10.7%，槓桿率31.2倍，在眾多恒指輪中，數據以佢最抵玩，睇好港股上半年升，揀呢隻。
恒指亦有可能升近20日線（約9660）阻力就回頭，再展開尋底之旅，因此要有兩手準備，揀定啲恒指Put輪隨時掉轉槍頭造淡。現時成交最活躍恒指Put輪係9556，3月28日到期，行使價9600，上周五收0.132元，溢5.3%，槓桿率18.2倍，數據尚算合理。如果個市彈完大散，則不妨小注9448博大堆。
章盛