英超聯賽程頻密，好多球員都露疲態，領隊迫住要球員輪流上陣，好似車路士就因為咁樣成績差晒。不過，凡事總有例外，如果大家同我求大俠一樣睇完修咸頓喺足總盃表現就知。
幾支英超球隊好似阿仙奴同布力般都喺足總盃畀部份主將休息，由後備上陣；但係若果有留意修咸頓對熱刺個陣容，基本上同佢哋喺聯賽嘅無分別，更難得成班球員全場重可以不停走動，迫到對手想企定諗吓點傳波都唔得，去到尾重可以照攻可也，完全唔受體力限制。
有咁出色表現，又難怪佢哋個領隊史特根賽後牙擦擦，話好彩比賽係電視直播，觀眾知道修咸頓唔再只係護級球隊，我求大俠都唔抵得要再讚吓呢隊波。
傑斯終於向外公布佢同女友嘅愛情結晶品將會喺五月出世，佢講到就快做老竇不知幾開心，重話一直都好小心照顧女友。不過，五月份正係球季尾，如果曼聯又要爭聯賽、足總盃同歐盃，咁傑斯真係好唔得閒，但係我求大俠就唔鼓勵佢好似李察胡禮咁，用人工催生，若果到時又捧盃又捧Baby，辛苦啲都冇所謂啦！
上個禮拜嘅省港盃首回合，球證幫廣東幫到出晒面，噚日次回合，港聯主場輪番本地球證執法，有啲判罰就多多少少秤先港聯，好似上半場廣東輸罰球，助理球證就走入場要廣東球員人牆要離球足十碼；但港聯輸罰球，人牆離球唔夠七碼都照開，真係咁都得，好在球證其餘判決唔算好差，否則肯定捱批！
前日輸波後發爛渣，將一台價值十萬美元嘅電視台攝影機掟爛嘅溜馬前鋒阿達斯，唔單只害咗自己要坐三場波監兼賠償對方損失，重累埋溜馬又輸波。因為阿達斯被罰停賽，溜馬噚日作客巫師時，惟有派新丁費特鍾斯替佢盯住佐敦，結果俾「波神」狂攻入四十一分，累到溜馬連輸兩場，阿達斯真係抵打PatPat。
噚日NBA可謂老鬼天下，一班年近四十嘅老將突然大發神威，打冧晒班二十幾歲嘅𡃁仔。首先佐敦拍奧克利，帶領巫師打敗由「小奧尼爾」同艾夏寧頓為首嘅𡃁仔波溜馬。之後，另一支老鬼波爵士又靠馬龍大發神威攻入今季新高三十三分，打垮加尼特帶領嘅木狼，證明班老鬼寶刀未老。
逢周一至周五見報