小初周末例牌去珠海打波，但上周六天氣實在太凍，打咗陣間已經冇心機再打，同一班波友走去飲茶吹水，其中一個本身做開建築嘅波友問小初，有冇留意到盈信控股（015）近排升勢凌厲，知唔知隻股搞緊邊科？
盈信上周五又升6.5%，收0.49元，接近52周最高位，成交亦算熱鬧，有成684萬元。
據講盈信呢隻股仔，街貨異常集中，向來都在少數人手上，舊年年頭至年中時，市場一直有傳聞話幕後人想做嘢，但好似話因為意見分歧，先至不了了之。直到去年11月份，有關人等終於講掂數，兼且度到足夠水源，在一聲號令之下，隻股終於開車炒上。
盈信上個月公布中期業績由虧轉盈，固然係其中一個炒作藉口。以往經紀陳曾提過，話隻股一直好希望拍住大陸方面搞作，有策略性股東支持，而真正目的不外乎發新股抽水，射手貨出街畀人，炒高股價則皆大歡喜。今次隻股有異動，可能因為搵到好幫手。
慕容小初