八方噚日返工，架車一過咗將軍澳就行唔通，因為有個長跑活動舉行，要封路。
對於體育運動，八方一向支持，所以塞吓車都冇所謂，不過以一個喺將軍澳工業邨返工幾年嘅過來人嚟睇，賽會就揀錯地方。
點解？第一，前後左右，放眼都係垃圾堆填區，有禽流雞屍，有死豬死狗，最近重有一截截人體殘肢，諗起都想嘔。第二，區內道路環境極差，大型垃圾車不停出入，廢料污水四圍飛，又從來唔見有人理；更諷刺係呢條最污糟嘅路，竟然叫環保大道！
八方想像自己參賽，喺垃圾中間跑，兩旁樹木，封塵半分厚，棵棵樹營養不良；所有建築物都係工廠，猛咁噴煙，唔使跑都氣促啦！
（圖）賽會揀喺烏煙瘴氣嘅環保大道進行比賽，真係苦了一班跑手。
區民傑攝
傳真︰2623-9278
電郵︰