黃伊汶（Dior）同經理人星皓公司搞得唔開心，最近已經解咗約，但係都冇影響佢嘅心情。
前晚黃伊汶二十二歲生日，環球唱片專登幫佢喺美麗華商場嘅加州紅卡拉OK搞生日派對，除咗有環球高層到賀之外，佢嘅師兄弟李克勤同余文樂都有嚟，伊汶媽咪就梗係一早到場招呼客人啦！
Dior成晚都好high，隊完香檳又隊啤酒，重有成四、五十人同佢慶祝，Dior話：「今年收到咁多份生日禮物之中，最令我感動嘅一份，係有位好朋友用咗好多個五蚊銀，砌咗我嘅英文名Dior出嚟。」
早排黃伊汶去咗日本個半月學跳舞，佢話成效唔錯，遲吓重諗住再去日本學多半個月，下月中就可以再戰江湖。
何韻詩噚日到金鐘添馬艦，出席港台宣傳環保活動，佢臉上爆咗兩粒暗瘡，之前阿詩喺《叱咤》頒獎禮爆咗一粒瘡就攞獎，𠵱家又爆多粒，相信佢今晚喺無綫《勁歌》頒獎禮又會再下一城。阿詩話每逢有乜嘢大時大節都會爆瘡，佢話：「可能佢慶祝我攞獎，賀吓我啩，不過如果爆瘡真係可以攞獎都唔怕，爆多啲，多啲嚟密啲手嘛。」
黃夏蕙噚日出現牛頭角警署，佢自稱係想了解佢嘅電話號碼俾人盜用嚟騙財一事。夏蕙姨話佢嘅電話號碼喺兩年前俾人盜用，最後件事不了了之。最近佢發現有人留咗佢嘅手提電話號碼周圍向人借錢，為免事件再發生，夏蕙姨希望警方能盡快處理。雖然電話號碼俾人盜用，但佢亦唔會轉電話號碼。
台灣台北之音電台早前搞咗個「百首經典歌曲網路票選」，所有候選歌曲都要推出達五年以上，喺上月一日到十五日期間，全亞洲共十八萬票裏面，王菲嘅《我願意》跑出，贏得冠軍，張學友嘅《吻別》就得第二。而童安格嘅《其實你不懂我的心》就掹車邊，排第一百位。
曾志偉噚日去紅館為《勁歌》頒獎禮拜神，本來佢出現時笑容滿臉，問佢有關個仔曾國祥日前俾人打完後報警求助一事，志偉就講咗句：「黐線！」然後就作狀打咗記者幾巴。到綵排走位時，志偉都匿喺休息室唔出嚟。
