十幾年前興起嘅日本地下漫畫同埋同人誌，最鍾意就係攞啲受歡迎嘅漫畫同電影人物嚟玩，有唔少主角重無端端被畫成同志㖭！近期隨住電影《魔戒二部曲：雙城奇謀》大hit，外國有網路藝術家即時跟上潮流，將《魔戒》入面嘅角色畫成男女同志，猥瑣得嚟都幾鬼搞笑㗎！
噚日我大口羅拉啱啱先上過一個網頁www.squidge.org/~praxisters/TBlotr.html，初初都俾入面嘅圖畫嚇咗一跳，事關我竟然見到肥仔梅里除晒衫攬住佢老友皮聘，又見精靈王愛隆同金髮神射手勒苟拉斯深情相擁，連莉芙泰萊（LivTyler）飾演嘅精靈公主都不幸變成女同志，簡直玩嘢玩到出晒位！
聽聞𠵱家嗰個網嘅留言板出現咗兩派網友，有人認為呢啲畫侵犯咗電影嘅著作權同涉及誹謗劇中演員，但亦有網友大讚畫家畫得十分正斗，認為畫作嘅性向同明星嘅性向無關，玩吓無妨喎！難得《魔》片嘅電影公司都好開明，認為呢啲網站只係無傷大雅嘅戲謔，反而可以證明套片受歡迎。