美股喺今年首個交易日高收3個巴仙，不過論成交量就連平時一半都未有，雖然有行內人話，如果首個交易日以紅盤高收，嗰年就會有運行，不過伏勝就唔信呢一套。
要問2002年邊一隻股仔嘅表現最差，伏勝可能一下子就數十零廿隻出嚟，但要問去年邊隻股仔嘅表現最好，就唔係太多啦，其中一隻較為有印象嘅就係做電腦機殼嘅嘉利國際（1050），單係舊年就已經升咗接近7倍。記得舊年年中同班分析員一齊返國內睇嘉利嘅廠房，當時已經覺得隻股有得諗，但估唔到竟然可以掂到咁緊要，可惜伏勝當日捉到鹿都唔識脫角。
聽班分析員朋友講，上個禮拜五，嘉利管理層同班分析員又再坐埋一齊，話有啲好嘢要分享吓，就係公司未來一年嘅發展路向，聽落好似好掂，各位今次一定要多多留意。
唔知各位呢排行街有冇發現一啲怪現象，就係啲金舖特別旺場，大多數人都係買黃金飾物，反而以前比較受歡迎嘅鑽飾就乏人問津。聽啲行內人士講，除咗今年可能係嫁娶好年頭，啲情侶要添置首飾之外，近日油價高企，令黃金提煉成本上升，加埋美國打伊拉克似乎係事在必行，啲金價升到咁高，為咗保值，好多主婦都加入「搶金」行列。有行家講，呢排可以睇番啲珠寶金飾股，佢哋今年嘅生意應該唔錯。更有行家話，下個禮拜做金廁所嘅恒豐金業（870）會有分析員聚會，好可能有啲筍嘢公布。呢隻股一向都喺分析員聚餐會後會有幾日唔錯嘅表現，各位炒家如果今年重未開齋，不妨考慮一下呢隻股仔。
伏勝