噚晚曼聯對樸茨茅夫好精采，雖然我哋體育版同事貼下盤失手，但有睇比賽嘅都應該同意，如果唔係樸茨茅夫前鋒基舒響落後一比二時單刀失機，未必無機會爆冷。正如講波佬講：「佢哋輸波但無輸風範」。話時話，估唔到曼聯排個咁強嘅陣，證明好重視呢個盃，唔通真係想搏做四冠王？
我求大俠同好多波友一樣，諗住曼聯過幾日又要響聯賽盃出師對布力般，所以呢場總會留力啩？點知曼聯擺大個頭用到九個正選。到曼聯俾對手追番一比二形勢逆轉，領隊費爵爺重要臨危出埋史高斯，真係精銳盡出囉。
今次搏到咁盡，真係擔心佢哋重有幾多力響禮拜二對布力般。噚晚場波咁緊湊，收費台搞嘅派對亦都好熱鬧，但如果可以嘅話，最好唔好猛咁唱首足總盃主題曲……拜託。
我求大俠差啲唔記得提大家，明晚有一場意甲補賽，由尾二拖連奴主場迎戰尾三阿特蘭大，記得留意一吓擂台榜首青蛙仔明日嘅推介啦。同時間重有十場意乙波。意乙𠵱家真係七國咁亂，前七隊只有四分距離，場場都咁激烈，最啱攞嚟考眼光。
我求大俠彈過羅馬王子托迪好多次，因為佢成日插水，畀唔到好榜樣人。不過有彈亦有讚，佢近日做咗件好有意義嘅事值得表揚。話說有位意大利小妹妹為咗想見托迪而離家出走。結果托迪就聯絡到個小妹妹，重勸到佢同爸爸媽媽認錯。托迪總算做咗一件好事。
利物浦領隊侯利亞原來同奧雲有個「君子協定」，就係若果賽前覺得唔可以上陣要即時向領隊滙報，及早搵其他球員頂替。我求大俠同各位波友一樣，當然關心追捧球隊嘅主將有無傷病，如果個個領隊好似佢哋咁有協定，又提早放料，等我哋知道最新情況就真係好到極。
噚日NBA波勁吹冷風，魚腩球隊好似灰熊、紐約人同金塊都贏波，ESPN直播嗰場馬刺主場對勇士咁，臨場馬刺讓到十一分半，最後好勉強咁三分贏波。另一場波累唔少波友損手嘅爆冷波應該係尾場超音速主場對金塊，主隊讓到成十二分，呢場波賽前點計都係超音速贏晒，點知最後倒輸十二分，搞到上盤客臨尾都翻唔到身。
姚明喺明星賽嘅得票超過咗奧尼爾，穩坐西岸明星隊嘅正選中鋒位置。奧尼爾平時做慣大佬，今次要佢喺明星賽坐冷板櫈，肯定唔順超，隨時罷打明星賽。米高佐敦、格蘭希爾同卡達早就話可能唔打明星賽，如果奧尼爾又唔打嘅話，明星賽嘅星味肯定大減！