本報記者英國凌晨傳真
德國寶馬車廠自1998年下半年接掌勞斯萊斯以來，全球車迷正期待新世紀轎車嘅誕生；歷時近五年之後，廠方終於宣布新一代Phantom嘅面世，更藉着美國底特律車展前，於英國勞斯萊斯嘅新根據地Goodwood，舉行全球發布會。究竟新世紀嘅勞斯萊斯Phantom變成點樣？各位車迷不如同我哋一齊前去會場，實行先睹為快啦！
記者、攝影：陳偉林
長途跋涉匆匆兩日來回英國倫敦，目的只係為一睹呢部勞斯萊斯新車嘅風采；當車廠新主席TonyGott上台講話後，與會近120位來自世界不同地方嘅汽車傳媒，都不約而同屏息靜候呢部Phantom嘅出現呢！布幔揭開，呢部轎車王者嘅Phantom果然不負眾望，既有突破勞斯萊斯嘅傳統，而車體線條亦滲有過往顯赫一時嘅車系美態；全新車首輪廓，或許令你未能一時間受落，惟近期寶馬7系嘅成功，卻令廠方高層對此甚具信心呢！
呢部車長有近6米，前後車重分布有50：50嘅新一代Phantom，糅合有30年代PhantomⅠ及PhantomⅡ嘅筆迹，加上50年代SilverCloud同60年代SilverShadow嘅長軸距、特厚C柱結構、深長車尾廂等特徵，配襯於闊大鬼面罩及扁長車燈組合，倒見有不少新意味；當中，至突出莫過於兩邊車門以左右開揭式組合出現，既利便乘客上落，而且重打破咗傳統豪華轎車嘅規範呢！
向來講究嘅勞斯萊斯轎車，響新一代Phantom身上更為着意，前後兩排真皮座椅，布置得猶如家中梳化椅，既貼服又舒適，加上多項電子化組合，諸如電腦化嘅i-Drive系統、後門自動索掣，重有頂級不過嘅音響系統、原廠左右獨立恒溫冷氣、引擎一按式啟動設計、免提電話裝置等亦一應俱全；難得響兩邊後門壁內，重收藏有原廠雨傘，嗰份縝密心思實在令人佩服不已呢！
喺今趟新車發布會上，廠方雖未有準備試車環節，惟綜觀一台全新6.7公升V12偈鋁合金缸體內，有齊現今最先進嘅可變ValveLift同ValveTiming，加上電腦直接燃油噴注裝置，起跑加速未有因為本身2485kg車重而有所影響；再者，四輪懸掛結構亦與寶馬7系相似，為前輪雙搖臂後輪多連桿組合，另備有電子液氣壓吸震筒、防傾桿等配搭，響廠方精密計算下，相信呢一代Phantom嘅操控性，會更見可靠出眾呢！
隨着有百年基業嘅英國勞斯萊斯車廠，納入德國寶馬集團旗下後，香港代理權亦響今年1月1日轉到森那美集團手上，惟據知呢部新款Phantom快者要響3月過後才會抵港關係，加上新代理仍未正式運作，想知多啲Phantom資料又或者有興趣擁有嘅朋友，就要耐心多等一會喇！
新車有別舊有勞斯萊斯傳統，一份Outstanding嘅風格既予人有耳目一新之感外，又不失穩重豪邁個性；加上車廂空間寬敞兼製作講究，重有上落嘅輕巧體驗，不失豪華轎車嘅王者風範。