何俊仁呢期夠晒忙，《基本法》二十三條搞到鬧哄哄，保釣行動又登場，佢前排趁有空檔去加拿大唞唞，度新歲兼探吓喺當地讀書嘅仔女，點知阿仁返到香港要向八方「懺悔」，話自己唔覺意唱衰咗香港。
話說阿仁上個月二十三號飛到去溫哥華，住喺就讀UBC嘅愛女家中，多倫多嘅細仔亦飛埋過去，不過好快阿仁就喺街俾人認出，重拿拿臨通知埋當地記者，於是成棚人湧去訪問阿仁，問佢關於二十三條立法嘅問題。
一心諗住去度假嘅阿仁，一張紙都冇帶過去，不過佢話經已識背二十三條，任何一個題目都可以隨口講兩個鐘。於是由電台講到電視、報紙；西岸呢頭講完，東岸嘅華文傳媒又再轉載，華人社區嘅反響之大出乎阿仁意料。
好多移民加國嘅港人，最關心「域外效力」會點樣影響到自己，亦希望港府可以多啲時間諮詢埋佢哋。當地華人久居加拿大，民主對於佢哋已經好似空氣咁自然，所以港府不惜同民意唱對台戲，佢哋都好驚奇，估唔到香港啲官員咁「強勢」。咁睇嚟，阿仁似乎係幫咗港府宣揚「強勢」形象，唔算唱衰喎！
傳真︰2623-9278
電郵︰