大編輯趁新年假期之便，與家人到吉隆坡旅行，大編輯做慣記者，善於考察民情，發覺吉隆坡市面繁榮，人民消費力強，與香港相差得遠咯。佢想起以前曾蔭權講過：「香港會係第一個反彈……」真係笑唔出。
吉隆坡市面價錢廉宜，生活優悠，一切都好好，但有一樣嘢好弊，就係遊客搭的士，無所適從，走動極不方便。大編輯話：「自酒店搭的士到唐人街，分四架的士，一架收十五元（馬幣），一架收十蚊，一架收七個半，一架睇咪錶收費，竟然只係三個四！啲的士上車就要講價，唔睇咪錶，講好價錢竟然中途變卦。我喺唐人街截的士返酒店，司機話會塞車，一定要收八蚊，一於照畀啦，上車之後，塞到唔行得，司機話兜小路行，但路程遠啲，要加多五皮，咁都得，但當時天下大雨，惟有照磅！」
吉隆坡搭的士價錢任噏，固然令遊客冇癮，但最激氣嘅就係喺街上截的士，根本冇人睬你，企喺的士站排隊，眼只見啲的士冇客（吉車）周街行，唔肯駛入的士站。大編輯走去一間酒店外搵的士，成班印度人司機企響度，個個叫價十五蚊一程返酒店，以馬來西亞價錢計，直情㩒住搶，於是又走返街上等，卒之等到一架華人司機揸嘅的士（就係上咗車要加價嗰位）。大編輯嘆曰：「香港的士雖然貴，勝在有秩序，唔使煩死人。」