前晚好多現任同前任女高官，趁住天氣驟冷，披上皮草亮相《魔戒二部曲》首映禮，八方亦有同大家報過料。
本來女士愛美，連梁愛詩、陳方安生等都未能不從俗，亦好自然，但係其中一位女士着皮草，八方擔心會有環保組織找佢晦氣，呢個就係「鐵蝴蝶」任關佩英。
任太自從舊年突然宣布六月退休之後，好似真係有心脫胎換骨，好似一改多年招牌齊耳短髮、走去劍橋讀暑期藝術課程、返港繼續學畫畫，似乎想徹底忘卻以往煩囂嘅仕途生涯。
不過乜嘢都可以唔記得，任太退休前做過兩年幾嘅環境食物局局長，大力提倡環保意識，就點都要記得。任太應該知道，着皮草等於生剝動物層皮為自己扮靚，其實幾殘忍。八方眼拙，睇唔出任太前晚嗰件皮草係咪真貨，如果係真，任太唔驚環保團體話佢表裏不一？
（圖）天氣驟冷，曾任環境食物局局長嘅任太都披番件皮草，環保團體點睇呢？
傳真︰2623-9278
電郵︰