「文化中心」範圍內喺平安夜俾人搞到烏煙瘴氣，滿地垃圾，教統局局長李國章鬧某些人「冇家教」。以前我哋鬧人「冇家教」，非常嚴重，被罵嘅細路或者冇感覺，但細路嘅父母就一定會反面，分分鐘會反目成仇㖭。
不過進入二十一世紀，好多人連乜嘢叫做家教都唔知，你話佢冇家教，佢會一片茫然。李師奶有一日上咗一架去中上家庭住宅區嘅小巴探訪親人，離開之時剛好碰上小巴又到站，一位阿太帶住小女孩上車，唔肯入車錢住，問小巴司機：「開得車未？」司機話：「就快開咯。」阿太叫住：「等等」，施施然打電話叫菲傭攞件風褸落嚟，小巴司機知佢係熟客，唔敢開住，如是者十個其他乘客齊齊等足七分鐘，一位肥菲傭匆忙趕到，遞上風褸，重要俾阿太鬧：「你要減肥啦，行得咁慢！」
李師奶喟然嘆曰：「中上人家都咁冇禮貌，自以為是，小女孩睇見阿媽咁自私，咁樣累人等，當眾鬧菲傭，你話佢大個咗，點會尊重他人！」
呢個故事都重未夠過癮，工程何以前係游泳高手，大學畢業後做兼職游泳教練，有唔少小學生跟佢學。上個月，一位五歲男童第一次上堂，落水未久，小童大嗌：「Mary，我流鼻涕呀！」Mary乃係菲傭，揸住張手巾紙，喺泳池邊手足無措，工程何話：「𡃁仔流鼻涕都要嗌菲傭，真想一掌㩒佢落水！」