好多人以為要身體健康，好多嘢都唔食得，其實並不一定，最緊要唔好過量就可以，而太肥或太甜食物唔好食太多。大部份健體中心都可以幫人檢查身體脂肪比例，再問問營養師意見就更好，記緊要多飲水。
每日盡可能抽半個鐘到四十五分鐘做適量嘅運動，可以做最簡單如跑步及游水等。而運動前記緊要最少十分鐘熱身同拉筋；而運動後同樣要用十分鐘度嘅時間放鬆自己，如果做得唔足，就會好易受傷，做完運動會有肌肉痛現象。
休息得唔好，又或者唔夠瞓，最好就唔好做運動，因為經驗話畀我聽，休息唔好仍然勉強去做運動會好容易受傷。做運動最好搵朋友或教練陪住，既有照應又有人陪，做起嚟自然放心好多。
想要健康嘅身體，運動同飲食係同樣重要，而做運動其實冇時限，就算行路都可以係一種運動。記緊運動前要做足熱身同做完後拉筋。