美國工業活動有擴張迹象，刺激美股大升逾3%。港股噚日亦勁升218點，恒指收報9583，不過成交只有43億元，反映動力不足。以美國市場為首嘅股份表現突出，品質（243）勁升9.7%、ASM太平洋（522）升6%、利豐（494）及德昌（179）升4.7%。
恒發（097）私有化失敗，相信四叔較散戶更失望，股價打回原形，跌破6元關口係預料中事，收市時能重上6元水平，已是超水準表現。恒發收6.20元，跌13.9%。
噚日中午停牌嘅鳳凰衛視（8002），又傳出資訊台獲得中國落地權，傳聞刺激該股在停牌前急升9%。其實鳳凰衛視已多次傳出獲得中國落地權，但以往冇次真。不過，黑客話呢一次會係堅料。如果係真，復牌相信要追貴貨。
嘉里建設（683）噚日勁升10%，收6.10元，成交1974萬元。嘉里上月合共回購22.65萬股，反映管理層認為現價偏低。
近期股市低迷，有唔少股份股價大幅低於資產淨值，吸引大股東提出私有化或向公眾股東進行大規模回購。
市場亦憧憬嘉里大股東可能提出私有化，或者提出重大回購建議，雖然以上暫時係股民一廂情願嘅想法，但並非冇可能發生。
電盈（008）將於下周三正式5合1併股，併股目的主要是想電盈變成至少1美元（7.80港元）嘅中價股，讓美資基金吸納。電盈噚日收1.35元，升4.65%，現價計，合併後只是6.75元，距離7.80元尚有15.5%「上升空間」。據聞大戶將有所行動，推高電盈變成1美元以上，方便美資基金接貨，信唔信得過則好難講。
阿虎