美股03年第一個交易日大發神威，帶挈港股噚日大翻身，恒指大升218點。港股新年新氣象，好友亦一洗頹風，睇嚟短期未升完。
噚日表現最佳大藍籌係長實（001）及和黃（013），兩者皆升超過4%。長實及和黃Call輪自然威風八面，長實及和黃噚日雖然升得急，但相比去年的37%及35%跌幅，反彈幅度只係濕濕碎。去年5大藍籌跌得最重係長實及和黃，跌得多通常亦彈得多，短期港股若續升，長和可扮演火車頭，可吼兩股Call輪炒番轉。
長實末日Call輪9517大上大落夠刺激，贏得勁時亦輸得甘，只啱拚命三郎。同類輪9596屬較佳選擇，昨收0.305元，溢價13.8%，槓桿率17.3倍，5月14日到期。數據幾合理亦最多人玩。想玩細啲可以買9649，昨收0.51元，溢價8.2%，槓桿率10.3倍，7月2日到期，年期較長，上落波幅亦冇咁大。
長實現時挑戰20日線阻力，破位上試54元，破關則有機會重展新升浪。短線支持位10日線51.40元，跌穿宜先止蝕。
和黃走勢比長實佳，守住51元可開展新升浪，但Call輪值博唔太多，末日輪9518太波動風險高，勉強可揀9666，收0.63元，溢價5.5%，槓桿率8.1倍，6月底到期，但上落又似乎細咗啲。
章盛