新年伊始，各大團體呢排都陸續舉行年終回顧記者會，房屋政策評議會總幹事葉肖萍噚日都搞咗個2002年房屋政策前瞻及回顧，八方都有去捧場。有行家問葉肖萍對房屋及規劃地政局「雙雄」孫明揚同梁展文有乜評價，葉肖萍就大讚兩人簡直係「最佳拍檔」，體現老董嘅問責制。
佢話：「佢兩個乜都攬上身，勇字當頭，孫明揚推出九招托市，梁展文就搞創意中心，退按金畀商戶同公屋居民，董建華簡直係深慶得人。」正當眾行家感到奇怪，葉大姐竟然對兩人有讚無彈？原來「戲肉」最後出現，佢大鬧兩位房屋政策掌舵人係居民嘅「禍星」，長此落去，香港市民大件事！佢話兩人太過急功近利，又唔理民意同房委會嘅意見，好似退按金畀商戶呢單嘢，向外公布咗之後先至諮詢房委會意見，非常唔尊重。
葉肖萍又好悲觀咁話，大吉利是講句，除非「孫九招」病死咗，如果唔係，政府肯定會落實以租津代替公營房屋嘅計劃。八方當然唔想租津計劃完全取代公營房屋，但係新年流流，更加唔想「孫九招」有乜頭暈身㷫。
傳真︰2623-9278
電郵︰