Hi!大家喺星期六都見到我求大俠，係咪覺得好奇怪呢？無他嘅，為咗配合革新版《蘋果波經》強勢出擊，我當然要嚟湊吓熱鬧啦，重會喺禮拜六、日將平日嘅「求驗客」變做「假日求驗客」㖭！希望大家多多捧場。
好嘞，言歸正傳，喺今日嘅英格蘭足總盃第三圈比賽中，最矚目嘅一定係英超擂台躉曼聯主場對英甲榜首樸茨茅夫呢場，表面上「紅魔鬼」似乎佔盡天時、地利、人和，而且曼聯似乎特別鍾意喺足總盃挫英甲榜首隊嘅銳氣，喺○○/○一球季就打贏富咸，九五/九六球季淘汰咗新特蘭。
不過，我哋嘅當旺名家華度就認為樸茨茅夫有機會開下盤。華度呢排認真勁，近四次推介英國波全勝，之前更中過曼聯對米杜士堡嘅下盤，既然華度咁有心水貼樸茨茅夫下盤，我求大俠就勸大家不妨跟紅頂白跟風嘞！
連尼加同漢臣呢兩名英國足球名宿，𠵱家做咗講波佬，照理對球賽嘅分析會比較客觀，但估唔到佢哋都會支持番以前效力過嘅球隊可以捧盃；前者就估熱刺，而後者要利物浦。好多球迷喺估波時，都會偏向揀番自己鍾意嘅球隊，但眾所周知足總盃成日爆冷，所以大家應該理智啲，如果見強隊讓得太多，就唔好拗氣嘞！
講開足總盃，𠵱家博彩公司為咗爭生意，真係各出奇謀，其中有一間就推出「買一送一」優惠；如果你買超聯球隊捧盃，只要佢哋第三圈對手係非超聯球隊，就會送佢對手。
呢個世界真係冇咁大隻蛤乸隨街跳！博彩公司甚少開蘇超聯賽事嘅亞洲盤，喺前晚無端端開咗，我求大俠嗱嗱臨推介兩大班霸流浪同些路迪嘅上盤，點知全軍覆沒，所以今日嘅足總盃一啲之前冇開盤嘅強弱懸殊比賽，好似阿仙奴對牛津聯，如突然開盤，球迷要三思。
英超球隊車路士可能見呢排球隊成績麻麻，即刻將外借畀英甲球隊狼隊嘅新晉前鋒C高爾收番，據講C高爾雖然未必會喺星期六對米杜士堡嘅足總盃披甲，但車仔領隊雲尼亞里咁做係想有競爭先至有進步，等其他前鋒好似哈索賓基同古莊臣等有更好嘅表現。
英格蘭足總盃第三圈展開，《蘋果波經》嘅七位名家都躍躍欲試，推介自己心目中嘅冠軍球隊。不過，估唔到原來本報名家大部份都係同外國名家好似連尼加一樣，唔多理實力，淨係追捧自己鍾意嘅球隊，所以得出結果係車路士同埋布力般都有兩票，成為「奪標大熱」。
逢周六、日見報