我羅拉真係好佩服叶姊妹呢兩個富婆，佢哋乜都夠膽講，雖然成日俾人話着到鬼咁暴露唔知博乜，但係佢哋會反駁話：「我喺屋企乜都唔着㖭呀！有本錢點解要咁大嘥！」
早排叶姊妹接受雜誌《MORE》訪問，重拎埋最鍾意嘅喱士T-back出嚟，對於日本記者話佢哋出席公開場合唔着底褲，身為家姐嘅叶恭子話：「我覺得若隱若現係最誘人嘅，我哋係專登唔着嘅，不過俾人話得多，𠵱家咪着番條T-back囉！」
被問到會唔會同窮男人拍拖嗰陣，妹妹叶美香話：「雖然我覺得人格最緊要，但喺我生命中根本唔會遇到窮人喎！」
生活奢華嘅叶姊妹直認絕對唔會去拉麫店、十蚊店呢啲平民地方，而鑽石手鏈亦起碼四條一齊戴，就算手機都要鋪滿Swarovski水晶，問你服未！不過當佢哋好自豪咁攞件山貓皮草出嚟晒嗰陣，我羅拉就覺得呢兩位姊妹太唔愛護動物啦！