美少女舒拉寶娃除咗人靚身材好之外，原來把聲都好勁，每次強勁抽擊都嗌到好大聲，其中一次同施莉絲來回球成十幾次，佢就嗌足十幾次；不過細路女始終唔夠經驗，每次佢想細力「縮矮仔」時會靜靜雞唔出聲，但係施莉絲呢啲老波骨又點會估唔到佢球路呀。
為吸引更多世界頂級球手來港角逐女網挑戰賽，賽會特別搵到球寶商贊助一支由二十四K黃金、鑲滿鑽石和寶石的球拍（圖），送畀喺挑戰賽贏得三次冠軍嘅球手（由今屆開始，球手不需連贏三屆）。而應邀出席記者會嘅俄國球手迪文泰娃（圖左）睇到這個二十五萬港元嘅球拍就眼甘甘，重笑笑口話好後悔已經出局，重問可唔可以重賽㖭，而今屆冠軍亦都可以獲得相同造型、但較細少嘅金球拍做獎品。
網球雖然係香港極受歡迎，但球迷對比賽就唔夠尊重，好似噚晚比賽，就多次有手提電話響聲打斷比賽，而球迷亦有遲到習慣，六時半展開的頭場，好多球迷成七點幾先到，出出入入，連球證都忍唔住叫觀眾快啲坐低。