日前商台舉行嘅《叱咤樂壇流行榜頒獎禮》，成班Stareast嘅歌手都冇獎攞，噚日旗下歌手李蘢怡（Tiffany）、陳文媛、三人組合E-kids出席尖沙嘴美麗華酒店舉行嘅「東華愛心歡騰賀新春」活動，李泳漢亦有出席。
嗰晚有份出席頒獎禮而提早離場嘅Tiffany話：「唔會因為冇獎攞而懷疑自己嘅實力，係驚佢哋冇信心畀獎我啫，經過呢兩個頒獎禮都學識啲嘢，唔好着咁靚出席頒獎禮，因為冇獎攞會好囗。」問她言下之意係咪暗寸陳慧琳（Kelly）盛裝出席都攞唔到獎？李蘢怡即刻好鬼緊張咁話：「我唔係話佢，我冇講佢，Kelly係樂壇一姐，我唔想得罪人呀。」
而冇獎項兼缺席《叱咤》頒獎禮嘅E-kids就話同公司協議唔出席頒獎禮，E-kids嘅Tommy話：「嗰個係遊樂場嚟㗎，可能我哋未夠十八歲唔畀玩機動遊戲啦，希望佢哋出年搞波波池。」
而曾公開同Twins嘅鍾欣桐（阿嬌）示愛嘅李泳漢，對於有報道話拍到余文樂同阿嬌秘密拍拖，李泳漢話：「唔信，除非佢面對面同我講，我會隨緣，但係媽咪（施明）見到啲報道好心痛。」
洪欣噚日喺柴灣拍《老行家珍珠粉》硬照廣告，為東南亞區做一年嘅代言人，酬金當然唔錯啦，雖然洪欣唔肯講實際收幾多錢，不過佢就話啱啱買咗架平治C240房車畀自己做禮物，架車市價賣緊四十六萬八千，佢重話家鍾意收藏鑽石
黃凱芹前日專誠喺加拿大返港，出席好友黎瑞恩嘅婚禮，順道去埋噚晚喺會展舉行嘅《魔戒二部曲：雙城奇謀》首映禮。雖然阿Chris今次可以主唱呢部荷李活巨片嘅主題曲，但壓力相當大，佢噚日接受港台《娛樂滿天星》電話訪問時話：「初初知道要填詞，壓力就係人人都知道個故事講乜，唔可以有乜差錯。」
無綫即將開拍一套劇集《美麗在望》，噚日劇中嘅幾位藝員林敏俐、左慧琪、郭晉安、鄭嘉穎就喺電視城試鏡，操半鹹淡廣東話嘅左慧琪可謂最蝕底，佢話：「第一次拍劇好緊張，戲裏面我會飾演模特兒，遲啲會叫媽咪預先幫我睇劇本，然後再拼音，我試鏡時要同鄭嘉穎做對手戲，但試完之後我都覺得OK吖。」
林熙蕾噚日不施脂粉出現中環，問到佢嘅近況，佢話已經同中國星約滿，𠵱家嚟香港傾新約。林熙蕾發展得好好哋，點解唔續約？佢話：「因為我想喺台灣發展，𠵱家其實有幾部戲傾緊嘅。」至於新一年會唔會搵番個男友？佢就話：「都想㗎，不過條件就係要我父母鍾意先得。」
