懷舊，可以講歷史，也可以談裝修。
26年歷史的Amigo，高官政要經常出沒，拿破崙酥皮餅熱賣26年；譽滿坊，古典裝潢富中國味，星期一至日，碰口碰面都是外地遊客，兩者皆是跑馬地的尊貴代表食肆，今生不得不儲錢去見識見識的懷舊店。
多番策動點心事變，結果把金箔、BB鮑、龍蝦及魚翅等矜貴材料，引入點心餡的的曾昭偉總廚，開門見山說明貴在用上等鮮料，加即叫即煮，例如用澳洲龍蝦包蝦餃，「唔係點賣你三十幾蚊籠？」
蓬萊鮮菇白菜餃$25(上)
京式蒜泥白肉卷$30(下)
有見太多食客都愛以素食作頭盤，曾師傅特地用味濃的鮮菇和爽口的白菜入餡，配以水灼熟的白肉，去肥，捲着芥蘭，蘸蒜泥汁，夠晒爽。
香滑芝麻糊湯圓$30(上)
特色香芒炸甜筒$25(下)
手磨芝麻糊，幼滑細密黝黑如墨汁，真係好花工夫，貴得有道理；奶黃加鮮芒，甜滑鮮味，筒皮脆而鬆化。
店名：譽滿坊
地址：跑馬地成和道63號
電話：28348893
營業時間：11:30am至4:30pm，6:00pm至11:00pm
在Amigo工作了半生的經理Peter說：「這裏乜都舊，裝修26年來未變過，人都舊，大部份夥計都工作超過20年以上。」回憶，他有說不完的趣事：「想當年，大把高官捧場，彭定康聖誕節例嚟呢度開Party鋸羊扒；霍德新年嚟呢度倒數；鍾士元、陳方安生最鍾意食海鮮……𠵱家，捨得開支酒嘅客都無！」猶幸有熟客撐場，拿破崙酥皮餅始終26年熱賣。
拿破崙酥皮餅
1件，堂食$60，外賣$30
招牌作，3層勁薄勁脆酥皮、1層蛋糕、2層忌廉，1小時前預訂，即叫即做，Peter：「試過有日賣咗50磅，師傅做到手軟兼頭暈，蛋糕、忌廉夾到亂晒龍，最後惟有同客講：是日沽清！」
抵食午餐
不景氣，不得不向現實低頭，Amigo推出抵食午餐，頭盤2選1、主菜3選1、2道甜品$180，餐牌每星期轉一次。本周頭盤有三文魚班戟配龍蝦汁，主菜則有燒戴安娜牛柳。
店名：Amigo
地址：黃泥涌道79A地下
電話：25772202
營業時間：12:00nn至3:00pm，6:00pm至12:00mn
十年涼茶亭
讓遊客以最直接的方法，嗒出中國飲食文化的滋味，龜苓膏$25盅，火麻仁、銀菊露、酸梅湯及廿四味等，細杯$7，大杯$9；魚蛋、茶葉蛋及豆腐花亦一應俱全。
店名：唐寅茶寮
電話：28932032
營業時間：朝10點半至晚10
地址：跑馬地成和道10號B
冬蔭車仔麵
日賣過百碗的冬蔭功湯車仔麵，連周星馳也是座上客。清一色泰國女廚揸Fit，以自家冬蔭功湯底配車仔麵，煮出名堂；湯粉$5，豬頸肉、札肉、香茅雞翼及豬扒等配料，各$6份。
店名：三盞燈車仔麵
電話：28360182
營業時間：朝11晚11
地址：跑馬地成和道67號地下A3號舖
中環半山總店，主攻外賣，堂食得兩座位；跑馬地店闊落得多，還有意粉供應，師傅拋轉麵糰的功力深厚，令2mm厚的餅底，入口鬆軟，沒機壓的硬實感。配料有魷魚、生蝦及三文魚等的海鮮薄餅只賣$130。
店名：PizzeriaItalia
電話：25725710
營業時間：朝11晚11
地址：跑馬地成和道77號地下
台式飲食店是區內的少數民族，餐牌除了台式麵點，還有精采的九份三杯雞$68，不過小記覺得蛋蜜冰$28至正斗，一來香滑，二來有五款味道，三來香港少有。
店名：台灣休閒一杯屋
電話：28345666
營業時間：朝11至朝3
地址：跑馬地綿發街10號地下
門面低調，好易走漏眼，一問才知，枱椅餅櫃，同舖頭一樣，都53歲囉！賣足半世紀的酥皮蛋撻$3、菠蘿油$5、絲襪奶茶$11、排骨飯和牛肉飯，碟碟都是陳老闆和廚師們的誠意之作。
店名：祥興咖啡室
電話：25725097
營業時間：朝6晚7
地址：跑馬地奕蔭街9至11號地下