政府先前將取消最低佣金制個波交畀港交所，港交所就會喺今個月十五號開董事會傾，雖然未知傾唔傾得成，但係業界已經按捺不住，八方噚日收到證券及期貨業職工會通知，決定喺本月二十三號晏晝五點召集所有經紀，喺中環遮打花園集合，遊行至政府總部請願。
唔知係咪因為啱啱過去嘅聖誕節，市民喺文化中心狂歡之後留低大量垃圾，除夕夜又發生清場事件，引來社會關注，職工會喺遊行通知上寫出遊行四大戒條，要求參與遊行嘅同業「穿着整齊、保持地方清潔、盡量克制情緒，勿作出過激行為」，兼且要遵守糾察員指示。為咗保持專業形象，佢哋重唔會沿途嗌口號。
職工會代表同八方講，選擇二十三號遊行冇特別意義，只係見到港交所遲遲未開董事會傾佣金制問題，所以積極發起今次遊行。
傳真︰2623-9278
電郵︰