今次真係俾經紀陳估中，大凌集團（211）供股計劃果然撻Q。不過，過程就同佢嘅講法有出入，今次供股失敗似乎唔係因為監管機構嘅壓力，而係在股東特別大會上被否決。
經紀陳想解釋，但欲言又止，佢只係話供股計劃無論因乜嘢原因否決都好，但供股唔成，其實係一早注定。但問到究竟係邊個唔想供股？佢就話唔多想講。
無論點都好，一間公司半年唔夠，兩次供股都搞唔成，確實係一個紀錄。記得上次，大凌在股份除權後，先至決定取消供股，搞到有部份投資者哇哇叫，好彩今次在除權日已經停咗牌，否則又會有投資者投訴。
上次大凌供股唔成，復牌後股價即刻大升，小初真係好懷疑今次會否歷史重演？
經紀陳就話兩睇，皆因今次大凌係被證監會叫停，幾時復到牌重係未知之數，另外重有好多其他變數影響，所以暫時真係好難估。
慕容小初