XBOX機迷期待已久嘅射擊大作《飛龍騎士ORTA》終於推出，今次世嘉落重勁料，除咗畫面超正、遊戲刺激外，重以支援DVD播放制式嘅5.1音效輸出為賣點，敵人360°方位攻擊聽得一清二楚，震撼度媲美荷李活大電影。有隻勁Game助陣，XBOX銷量立即飆升。今日我哋更請嚟射擊Game高手阿鬼，教大家對付最終Boss三個形態㖭。
記者：徐影龍
逢星期一至五刊出
雖然PS2具有Optical（光纖）輸出，不過以睇DVD用途為主，冇乜對應5.1嘅正Game推出，今次世嘉喺XBOX上推出《飛龍騎士ORTA》，不但以超靚畫面吸引機迷，而且重學DVD影碟咁對應真正5.1音效輸出頻道，臨場包圍感十足，敵人喺邊個方向飛嚟都一清二楚，尤其係漫天敵人同時攻擊主角時，扭大音響更令震撼度爆燈。
靚聲靚畫外遊戲亦好刺激，除咗為數共十關嘅唔同首領級巨形敵人外，一般嘍囉都唔易應付，尤其處於大型戰艦及「深層記憶」中穿梭殺敵，速度飛快兼上下左右轉嚟轉去，飛到頭都暈埋，重要應付大量敵人，相當之刺激。旺角及灣仔多間Game舖均表示，今次《飛龍騎士ORTA》令XBOX吐氣揚眉，連帶主機都好賣咗差不多40%，成績相當不俗。
換咗色差同光纖接駁後，震撼度何止倍升，直頭打到唔願停手，令我覺得花多二百幾蚊買AdvancdAVPack同光纖線都好值得。
人如其名，十足十電影《鎗火》入面嘅阿鬼，以射擊準確及反應快見稱，佢由咸豐年代嘅《FantasyZone》到近期大Hit嘅《班鳩》，都以極速時間爆機，兼且不時重玩以更高分數作為自我挑戰。有佢教路打《飛龍騎士ORTA》，爆機唔再係難事。
今集最大賣點就係自由變身三種飛龍形態，三者屬性各有不同，絕對唔可以單靠一款形態而爆機，熟習三者特性為爆機首個要訣。
最終首領唔算難打，不過三個形態各有古怪攻擊，熟習其屬性後可大幅提升段位確認。
今次世嘉可謂賣大包益機迷，除咗附送有四首原創音樂嘅SoundTrackCD外，遊戲入面更設有一個「Pandora'sBox」模式，收錄大量附加元素，只要滿足特定條件就可開啟，當中包括多段動畫及插圖、所有敵人3D化圖鑑、遊戲世界觀及專有名詞解釋等，重有一隻以帝國軍少年軍為主嘅迷你遊戲，揸住架「錢七」清除敵人及完成任務，相當過癮。最正斗係學《風之指揮棒》預約特典咁，額外附錄第一代《飛龍騎士》完全版，雖然玩法冇變，不過畫面及流暢度因機能而大幅提升，比當年Saturn版更正，加上開啟難度唔高，以Easy爆機已經玩到，啱晒Fans懷舊之用。
筆者一向有捧開《飛龍騎士》嘅場，不論射擊定RPG玩法都玩到唔停得手．闊別多年，以全新姿態登陸XBOX，的確有種脫胎重生嘅感覺，而且憑住超強機能，聲畫兩方面一啲都冇令機迷失望，最重要係遊戲性依然精采，令人好易投入其幻想世界之中。總括嚟講《飛龍騎士ORTA》為世嘉及XBOX打勝一場漂亮嘅仗。
遊戲類型：3D射擊
對應機種：XBOX（日本及香港版）
遊玩人數：1人
開發商：世嘉
售價：$398
(c)SmilebitCorporation/SEGACORPORATION,2002