在《新城勁爆頒獎禮2002》中勇奪新人王的二人組合Shine，為出席當日頒獎禮而花掉二萬元購買踢死兔和西裝。Shine可謂「着得唔好嘥」，日前他們在元朗拍攝新歌MV時，竟穿上這套《勁爆》戰衣瞓街、坐紙皮箱兼推車仔。
二人男子組合Shine，早前在《新城勁爆頒獎禮2002》中勇奪新人王，因他們首次出席樂壇頒獎禮，為隆重其事，天佑和又南合共花掉二萬多元，購買全套黑色靚衫，包括RafSimons西裝、HelmutLang西褲、Agnesb皮呔、皮帶和Nike波鞋。
Shine出席頒獎禮後，翌日大清早即往元朗郊區，拍攝新歌《天又藍》MV，二人照樣穿上《勁爆》戰衣上陣，他們各自拿着黑色和白色的雨傘，在路邊漫步，導演更要求二人席地而睡，又安排二人分別屈身坐入一個紙皮箱內，坐在紙盒內的徐天佑，更連人帶盒被搬至一部手推車上，黃又南則推着車仔，邊行邊唱歌。
當日天佑身穿價值八千元的「踢死兔」禮服，又南的西裝也值六千元，對於穿頒獎禮戰衣瞓街拍MV，天佑說：「冇所謂，都要洗㗎啦，公司叫我哋着黑色西裝拍嘢，咁咪着番呢套囉。」問他們會否感到肉痛？又南即笑說：「唔會，我就住嚟瞓㗎，用輕功嘅，個身輕輕掂住地下啫。」
不過，Shine表示因這套新衫是他們首次奪獎所着的戰衣，所以他們洗乾淨之後，會將戰衣好好保存，作為紀念。
採訪、攝影：朱芷瑩
