麥浚龍（Juno）日前喺《新城勁爆頒獎禮2002》中得到「勁爆新人王」獎項，佢去慶功宴時學足劉德華攞影帝一樣，喺保母車伸個頭出嚟向歌迷致謝，好似出巡一樣，十分架勢。
點知Juno呢頭開心完，佢前晚出席商台《叱咤樂壇流行榜頒獎禮》時卻食白果收場，認真無癮。
Juno前晚喺台下等宣布「叱咤樂壇生力軍男歌手」獎項，銅獎同銀獎由蕭正楠同余文樂奪得，當頒到金獎時，台下突然噓聲四起，怕且Juno以為自己會得金獎，但當司儀宣布胡彥斌係得主時，台下即刻傳來歡呼聲，而Juno就即刻黑面，佢重冇去到大會個慶功宴㖭，同早幾日佢意氣風發嘅表現，判若兩人。
而陳小春前晚喺《叱咤》頒獎禮攞咗「叱咤男歌手」銅獎，佢話：「我攞完銅獎，下個目標係攞金獎，唔係老竇同阿媽大把錢話點就點。」小春嘅說話有暗寸Juno之嫌。
關心妍、蕭正楠同王喜噚日出席「點蟲蟲——開開心心學飛」宣傳活動，就現場所見，關心妍同蕭正楠呢對緋聞男女睇表演時不時咬耳仔，反而冷落咗旁邊嘅王喜。關心妍重話噚晚臨瞓前暈低咗，好彩佢隻狗好醒目咁嘈醒佢媽咪，所以佢今日都抽時間去咗睇醫生。
陳見飛噚日去到啟德出席簽名義賣活動，對於有周刊話佢細佬陳冠希（Edison）牽涉入六角戀當中，陳見飛就話完全唔知道呢件事，佢重話近來Edison喺美國嘅朋友嚟咗香港，所以佢喺屋企淨係見到大班男仔一齊打機、睇電視，反而從來冇見過女仔出現。
正東內地新人胡彥斌前晚喺商台「02年度叱咤樂壇流行榜頒獎禮」勇奪「生力軍男歌手」金獎，之後佢喺後台接受訪問時話：「我加入樂壇很短時間便有機會拿到這個獎，我很開心。我覺得香港的樂壇跟內地很不一樣，香港比較密切和團結。」佢重話𠵱家公司幫佢傾緊去台灣發展，不過所有嘢重未落實。
王喜噚日去到九龍塘一間老人院出席活動，王喜話每個禮拜都會去做義工，而新年佢會返鄉下祭祖之餘，重會探吓自己九十幾歲嘅婆婆。另外，王喜喺老人院猛咁捉住一個小朋友影相，佢話因為覺得嗰個小朋友同佢好似樣喎。
不時有傳林憶蓮同老公李宗盛鬧婚變，而林憶蓮啱啱推出嘅新曲加精選碟，就有首新歌《最好的事》係李宗盛填詞，而且亦係佢哋夫妻三年以嚟第一次合作，歌詞入面寫：「這一年裏有苦有甜蜜……最好的事，那就是愛着你……喜歡我和你之間的關係，是愛人也是知己。」歌詞都寫到出面啦，擺明話畀所有人知佢哋冇情變呀。
