喺二○○二年年尾（十二月二十九日）嘅《城市論壇》，最後一位發言嘅係一位老人家，論壇常客，好似係姓朱，佢嘅發言，通常係善頌善禱，希望港人和諧共處，社會安寧之類，呢日佢兩句話反映好多基層打工仔嘅心聲，就係「希望聽日有工做，有糧出。」
曾幾何時，香港人在每年一月，就係吼實「搵食版」，過完農曆年分分鐘搵工跳槽，邊會抱有咁卑微嘅希望：「有工做，有糧出」㗎。香港經濟搞成咁，都唔知可以賴邊個。
經濟既然如此低沉，有乜辦法搶救？在座嘅聖保羅男女中學學生講到一九二九（一位男生講錯咗一九三九）嘅大蕭條，曾淵滄教授話美國可以印銀紙，香港絕無可能，因此唔能夠採取赤字預算，用財政政策嚟刺激景氣。
不過必須在此補上一筆，為在場嘅聖保羅男女及明愛莊月明中學學生消消毒；印銀紙係貨幣政策，無限制咁印銀紙，擴大貨幣供需，絕非良好政策，美國亦唔會咁做。美國支持政府赤字，係不斷發行國債，呢啲美國政府債券，由廣大投資者購入（中國、香港、日本……全世界），換言之，中國日本大力支援美國政府嘅財政，發行債券，唔等於印銀紙，只係「抽水集資」，吸取美國及外國人嘅銀紙畀美國政府使啫。如果香港特區有此能耐，亦可以不斷發行港元債券嚟冚啲六七百億赤字，但係點解唔得呢？因為全世界都相信美國經濟力量，但冇乜人會信香港！