樓市由一手主導，所以有新盤開賣嘅地區，地膽代理行成績都唔會差得去邊。好似馬鞍山咁，舊年有四個新盤推出，中原喺該區分行嘅佣金收入勁升，據中記馬鞍山助理分區經理陳曉陽講，舊年總共做到四千二百萬數，比01年多近一倍，重係97年後嘅新高。
中記喺馬鞍山區有五間分行，約六十員工，舊年總共促成近八百宗買賣，當中超過五百宗係一手貨。
舊年成績咁標青，主要因為區內有四個大盤開賣，分別係曉峰灣畔、海典灣、迎濤灣同嘉華星濤灣，陳曉陽話淨係呢幾個盤已經為佢哋帶嚟千五萬佣金。佢重透露，公司就有五名同事全年做到過百萬數。
陳曉陽指中原喺區內嘅分行同人手最多，八成同事年資五年以上，所以喺call客方面佔優勢。
雖然今年馬鞍山冇大盤開賣，但陳曉陽強調，會搞好同區內業主嘅關係，然後帶客去外區買一手樓，重話有信心條數可以同舊年睇齊。
房協喺樓市高峯期推出嘅夾屋，唔少買家已變成負資產一族，喺𠵱家嘅環境下，要還錢畀銀行外，又要同時償還二按欠款，都幾吃力。夾屋大聯盟早前就夾屋負資產業主償還二按等問題，進行問卷調查，結果喺嚟緊嘅禮拜日發表。
今次發表調查結果嘅地點，就喺夾屋沙田芊紅居平台，出席嘅有議員、區議員同夾屋大聯盟嘅代表。
由於房協推出嘅夾屋數量唔係太多，涉及嘅業主數目自然唔似得私樓或者居屋咁多，所以佢哋嘅苦況就較少人知道。
舊年發展商搞上海睇樓記者團，多到用手指都數唔晒，上個月世茂集團啱啱請完記者去睇世茂濱江花園，今個月又有另一個上海睇樓團，就係和黃嘅豪宅盤匯賢居。
和黃呢個樓盤共建有七座住宅，359戶，舊年喺當地做咗三次內購，賣出205伙，剩番嘅第一座154個單位，計劃今個月中港兩地開售，所以請記者上去睇吓。
菱電執行董事梁家棟不嬲都鍾意講歷史，噚日喺飯局如數家珍，講晒咁多間外資同華資物業代理嘅興衰史，加埋美聯張錦成嘅唱和，就更加眉飛色舞幾乎停唔到口。由72年美聯喺美孚新邨扎根講起、到78年創立嘅中原、利嘉閣前老細點樣喺大埔康樂園起家等，資料豐富詳盡足可成書。
其間佢又不忘勉勵年輕人點樣逆境生存，重話年輕人有大把青春同時間，比首富李嘉誠重要富有。
講講吓差啲唔記得今次記者會嘅主題係大埔美菱居，畀咗美聯做獨家，同時新增頭三年延期還本嘅付款方法，首批五伙，呎價2153蚊。
富城物業管理公司上個月攞到房委會兩項「優質環保物業管理公司大獎」，旗下管理嘅兩個屋邨，就攞咗「優質環保屋邨大獎」，一次攞四個獎。
富城到𠵱家夾埋攞到二十三個由唔同機構頒發嘅環保獎項，係本港物業管理公司中最多。富城董事總經理鄭錦華話，公司制訂一套環保政策，喺屬下三百幾個物業推動。
蘭西
電郵地址：