四叔李兆基旗下嘅恒基地產私有化恒基發展，需要獲得小股東通過，恒基揀喺○三年第一個交易日表決，可能諗住頭威頭勢攞個「頭彩」，點知人算不如天算，議案喺百分之二點四九嘅股權反對下觸礁。
雖然四叔係關連人士所以唔可以投票，不過私有化咁大件事佢都應該出席，但八方噚日竟然唔見佢老人家現身，只由其左右手林高演主持大局。據悉，四叔每年聖誕假都會去滑雪，八方心諗四叔應該係玩得高興，未能主持大局，如果有佢老人家坐鎮，可能獲更多股東支持，結果或者唔同。
講番噚日嘅股東會，最慘都係一班長期支持恒發嘅小股東。有位小股東散會後同八方訴苦，話今次認真「揩嘢」，皆因佢聽到話私有化恒發之後，本想趁高沽貨，點知聽咗個經紀講，話恒地會調高個收購價，又話好大機會私有化成功，叫佢咪沽貨囉，今次表決失敗，恒發股價肯定大跌，所以今次可說「發唔到新年財」。
不過，另一位姓李嘅股東就唔同，佢同八方講，自己重有五千股恒發喺手，喺股價八個二時買入，但另有三萬五千股就喺五個六至五個九嘅水位買入，而且在八個幾時沽咗，賺咗幾萬銀，剩低嘅股票雖然蝕本，但拉勻仍有賺。
傳真︰2623-9278
電郵︰