北上雜誌：
最新中信城市廣場細舖有睇

最近深圳有一個極受矚目嘅大型商場開幕，商場樓高六層，佔地80萬平方呎，場內更有西武和吉之島兩間大型日式百貨撐場。不過我就覺得大型百貨無乜特色，反而細舖更加有睇頭，好以日本髮型屋、過癮迷你鐘、潮流牛仔褲等細商店，反而更能引起我的購物慾！ 記者：歐嘉荃
攝影：Manny
ImageGirl：Marcella

搞鬼時鐘店
拍住拖好溫馨
男朋友買嘢送畀女朋友，呢對鐘簡直無得頂，一男一女拖住手仔，真係冧到痹，雖然男女公仔都用合金製成，不過女仔就用上磨砂金屬，男女不同，絕唔單調。
售價：?216

顧客直擊魯小姐（學生）：
「我覺得呢度啲產品好得意，設計簡單得嚟又夠大方，我屋企都有個飛機外形的鐘，嗰個係朋友送嘅，我好鍾意！」

小熊鐘手腳任你舞
睇勻全間舖，我最鍾意呢款自家製造嘅BearBear熊座枱鐘，BearBear熊用顏色合金製成，身高只有7cm，手腳又可以郁動，鐘仔細細夠晒Kawai。
售價：?150

Fantasy
地址：深圳中信城市廣場L1071號舖
營業時間：10:00am?0:00pm

日本髮型屋首次進軍內地
一個鐘髮型大變身
髮型屋於日本已有十年歷史，今次首次進軍國內，選址深圳，希望可在國內大展拳腳。髮型屋採用會員制，入會要買?3,000、?5,000或?10,000的現金券，然後每次光顧可享7折優惠。如果搵CreativeDirector嘅阿Ray，包洗剪就盛惠?900，即使有七折，都非常揦脷。今次阿Ray同創作組的Odi就喺一個鐘頭內幫Model設計了一個前衞髮型。

變身前：純情直髮Look
Model點睇：「我鍾意前面啲辮仔，幾啱我嘅Style，後面啲頭髮就好似誇張咗啲，可能我平日少Set頭，唔係咁習慣，不過都幾好睇！」

變身過程：
印度民族辮仔
阿Ray見Marcella年紀輕，頭髮又長，希望增強佢嘅青春氣息，所以將前面的頭髮結成辮仔，帶少少印度Look。

日本流行玩髮夾
至於後面就玩日本最流行的頂夾造型，用髮夾將一束一束的頭髮夾起，並將頭髮向左右及向前移。層次感強烈，又夠Modern。

顧客直擊王小姐（商人）
「呢度剪髮同染髮都比其他髮型屋好，我呢個月都幫襯咗3次，2次剪髮、1次染髮，每次都要千幾蚊人民幣，喺本地嚟講屬於高消費。」

國內客好奄尖
阿Ray係店內的創作總監，是日本總公司委派而嚟嘅髮型師之一，他說：「國內客比香港客難服侍，同佢哋Set頭前一定要溝通得好好，香港客就唔會理我哋點整，最緊要效果靚！」

F.MHairCreative型男索女
地址：深圳中信城市廣場西武百貨四樓
電話：（86）75525945468
營業時間：10:00am?0:00pm

牛仔褲坐鎮
美國品牌牛記最勁
喺商場的地庫係一個名為LOOKS的年輕人百貨公司，內裏雲集三十多個外國服裝品牌，好似CHEVIGNON、TOUGH，以及日本的COCOLULU等，不過就以美國牌子Mudd最吸引我，佢最出名就係牛仔布系列，呢一排牛仔褲可以話係鎮店之寶，全部的洗磨色水都好鬼正，由?220至?360，尺碼由24至30均有。

毛毛人字拖
全店Model最鍾意呢對毛毛人字拖，全對鞋用又柔又輕的毛毛製造，而且顏色夠晒姣，真係唔買都要摸摸佢先捨得走，售?180。

LOOKS潮流視窗MUDD
地址：深圳中信城市廣場B1層209店
營業時間：10:00am?0:00pm

歐洲家品
人手縫製手工靚
呢間店舖專門售賣歐洲的家品，好似呢個相架同燭台就最夠晒Elegant，店員話布上的珠仔由人手逐粒逐粒釘成，喺香港買的話，無$200都唔使落樓。
售價：?115（相架）、?60（燭台）

靚靚毛毛筆
唔好意思，我對毛毛特別有好感，所以見親有靚的毛毛精品都一定要介紹畀各位，好似呢支毛毛筆，我就覺得超靚，筆頭上有大大個毛毛球，連筆桿都包住毛毛，靚到買咗都唔捨得用。
售價：?80

LeeSue
地址：深圳中信城市廣場下層48號舖
電話：（86）75525941003
營業時間：10:00am?0:00pm

睇得夠豪
深圳首間五星戲院
佔地3000平方米的新南國戲院是深圳市第一間五星級戲院，共有4間影院，每間影院的座位唔夠200個，排與排之間的座位夠晒闊落。放映設備全用英國的Harkness及美國的Strong，音響則以英國Dolby並用6.1聲道立體聲，視聽設施一流。

一站式配套
除了娛樂設施外，戲院內更設有咖啡廳，各位可以在開場之前歎番杯咖啡，或者食餐飯都得，配套夠晒完善。

新南國影城
地址：深圳中信城市廣場C1區三樓
營業時間：11:00am?2:00mn